Sutea Lekuonan
Soldatze lanetan zebilen langile bati txinpartak plastikoa eta pladurra zegoen eremura ihes egin dio, eta horrela sortu da sutea.
Sutearen irudia. 
Suhiltzaileak berehala iritsi dira Lekuonara.
10:30ak aldera, sutea piztu da Lekuona eraikinean. Kulturgune bihurtzeko lanak egiten ari dira okindegi zenean, eta antza, langile bat soldatze lanak egiten ari zela, txinparta bat plastikoa eta aislamendu materiala zegoen eremura iritsi da, eta horrela sortu da sutea. Langileak saiatu dira su-itzalgailuekin sua amatatzen, baina ezin.
HITZAk jakin duenez, eraikinaren egituran ez dago sakoneko kalterik, baina zati baten teilatuan izan dira matxurak, Oiartzun ibaitik hurbilen dagoen zatian zehazki. Suak sortutako kea nabaria izan da. Ikusmina eragin du herritarren artean gertakariak. Suhiltzaileak berehala bertaratu dira, egoera kontrolpean dute.
Julen Mendoza jarduneko alkateak jakinarazi du ez dela ezbehar pertsonalik izan, “hori da inportanteena”. Alta, kalteak handiegiak ez direla adierazi du Mendozak, eta jakinarazi du sutea zergatik sortu den zehazki aztertu behar dela. “Une honetan nahiko langile zeuden lanean. Langileak kanpora onik atera dira. Sua kontrolpean dago, eta espero dugu ondoko fatxadara —eraikinaren zati berria izango litzatekeena— ez iristea. Hori ere kontrolatzen ari dira suhiltzaileak”. Sutea itzaltzen denean kalteak zenbatekoak izango diren neurtzeko aukera izango dela jakinarazi du Mendozak, “kalteak sabaiaren eta pladurraren aretan daude, ez dira ikusten kanpotik. Barrualdean ez du inolako eraginik izan suteak”.
Jarduneko alkateak jakinarazi du Lekuonako espazioa urrian direla irekitzekoak, “madalenetarako obra bukatutzat ematea da asmoa. Gero baimenen txanda iritsiko da, eta urrirako dago aurreikusia zabaltzea. Alkate bezala nire azken egunerako, albiste txar bat. Espero duguna da ahalik eta kalte gutxien izatea eraikinak, eta ahalik eta azkarren irekitzea. Kultur fabrika garrantzitsu bat izango da herriarentzat”.
