Abesti eta guzti dator Atlantikaldia
Marea biziak leloa izango du aurten Errenteriako Udalak antolatzen duen Kultur Topagune eta Musika Jaialdiak, eta seigarren aldia irailaren 19tik 22ra ospatuko da.
Atlantikaldiaria artxiboko irudi bat. Sorkuntzaz gainezka dator, beste behin ere, Atlantikaldia. Marea biziak leloa izango du aurten Errenteriako Udalak antolatzen duen Kultur Topagune eta Musika Jaialdiak, eta seigarren aldia irailaren 19tik 22ra ospatuko da. Aurten gainera, berritasun bat izango du gutxienez, kantua izango duelako, propio Atlantikaldiak. Nøgen musika talde donostiarrak egin du kanta Beñat Gaztelumendi bertsolariaren hitzak oinarri hartuta. Grabazioa, berriz, Usurbilgo Haritz Harreguyren estudioan egin dute.
Atlantikaldiaren kartela.
Kanta, beste sorkuntza prozesu baten emaitza da. Ibilbide laburreko taldea den arren, zeresan handia eman zuen hiru kantako lehen EParekin, eta joan den Gabonetan Liv Til doden (Hil arte bizi, danieraz) diskoa aurkeztu zuen Nøgenek. Pop folk urbanoa oinarri hartuta sortu du taldeak Atlantikaldiaren abestia.
Dagoeneko kartela ere eman dute ezagutzera jaialdiaren antolatzaileek. Euskal Herria eta Mexiko Atlantikoak banatzen dituen bi herri sorkuntzak batu ditu. Errenteriako Savanna estudioko Arrate Rodriguez eta Carlos Ndungmandun eta Daniel Delgado Pistachie ilustratzailea mexikarraren arteko elkarlanaren emaitza da aurtengo Atlantikaldiaren irudia eta kartela. Ozeano atlantikoaz bestaldeko Marea Bizien erritua islatu nahi izan dute bertan, mexikar magia oinarri hartuta. Mexikon egin dute lana, zehazki, Guadalajaran. Irudia, bi jainkosa mexikar konjuru bat egiten.
Sorkuntzak aurtengo Atlantikaldian ere garrantzia berezia izango duela jakinarazi dute antolatzaileek, eta dagoeneko 2019ko ekinaldia sorkuntza prozesu ezberdinetan barneratuta dagoela gogorarazi dute, “ohiko Itsas elkarrizketez gain, Eskozia eta Euskal herriaren arteko Atlantik 1050 proiektua abian da, besteak beste”.
