LGTBIQ+ egunean, zinema kalera Lezon
Hilaren 28an, 22:00etan eta Saldise plazan, 'Bide zuzena ibilbide okerrak' dokumentala ikusteko aukera izango da. LGTBIQ+ Harrotasunaren Eguna da 28a.
Dokumentalaren fotograma bat. Hilaren 28a (ostirala da) LGTBIQ+ Harrotasunaren Nazioarteko Eguna da. Lezoko Udaleko Berdintasun Sailak bat egin du egunarekin, eta horren harira, kaleko zinema emanaldia antolatu du, gauez. 22:00etan da saioa, Saldise plazan, eta Bide zuzena ibilbide okerrak dokumentala ikusteko aukera egongo da. Gasteizko LGTBIQ+ mugimenduaren 25 urteko bidea kontatzen da Hala Bedi irrati libreak eta Luma Gorri elkarteak elkarlanean garatutako proiektuan.
Dokumentalak Francisco Vadillo Francis Errenteriako transexualaren erailketa eta Stonnewall Inn-en izandako gertakariak (New Yorkeko taberna, 1969an hasi ziren bertan AEBko gay mugimenduko kideak euren askatasunaren aldeko borrokan) ditu abiapuntutzat.
Izan ere, lehena hil zutenetik 40 urte betetzen dira aurten, eta Stonnewall Inn-eko berdintasun erreboltaren 50 urte. Gainera, dokumentalak hainbat elkarrizketa daude, adibidez, Jose Angel Cuerda Gasteizko alkate izandakoarena, edo RIP taldeko Txerra Bolinagarena.
Jarraian, dokumentalaren trailerra.
