'Aita Mari' erreskate ontzia Pasaiako Portuan dago
Getariako 'Aita Mari' erreskate itsasontzia, Pasaian da igandeaz geroztik. Hilabete emango du gehienez badian, matxura batzuk konpontzen eta abuztuan Greziarako bidea hartu nahi dute berriz ere.
Hilabete emango du 'Aita Marik' Pasaiako Portuan matxura bat konpontzen. Berriak jakitera eman duenez Grezian egon den Aita Mari itsasontzia, Pasaiako Portuan da, atzoko arratsaldeaz geroztik. Donibaneko kaian dago ontzia, pabiloien alboan eta hilabete inguru emango du bertan, matxura bat konpontzen. Hala ere, Itsas Laguntza Humanitarioa Gobernuz Kanpoko Erakundearen kideek argi dute hasitako bidearekin jarraituko dutela, eta abuztuan Greziara itzuliko direla. Bitartean, Pasaiako badian emango duten denbora, baimenak eskatu eta bestelako tramiteak egiteko baliatuko dute.
Grezian du jatorria proiektu honek. 2015ean milaka errefuxiatu eta migratzailek Egeo itsasoa zeharkatu zuten, gehienak, Siriako gerratik ihesean. Estatuen utzikeriaren aurrean, elkartasun olatu batek Europa osoa zeharkatu zuen eta hamarnaka GKE sortu ziren, pertsona hauek itsasoan ito ez zitezen. Azken urteotan ordea, itsasora ateratzeko baimenak emateari utzi diote hainbat estatuk. Aita Marik ere espainiar estatuaren utzikeria pairatu du, ez baitute baimenik itsasoan dauden ontziei laguntza emateko.
Gauzak horrela, Libian erreskateak egiteko baimena lortu ezean, migratzaileei osasun arreta eskaintzen jarraituko dute Grezian.
