[Bideoa eta galeria] Mobilizazioak biderkatu eta indartu egingo ditu Duintasunak
Orain arte lortutakoa mobilizazioei esker izan dela esan du Duintasunak, "baina asko gelditzen da egiteko, Hego Euskal Herrian 825 euroko pentsioetara heltzen ez direnak 225.000 pertsona direnean, eta hauen zati handi bat 650 euro baino gutxiago jasotzen dituztenean".
Hamarnaka pentsiodun eta jubilatuk hartu dute parte manifestazioan, gaur ere. Errealitatearen garaia eta ez promesena dela esan du Duintasunak gaur. Hileko lehen astelehenero bezala elkarretaratzea eta manifestazioa egin dute hamarnaka eta hamarnaka pentsiodun eta jubilatuk, ikasturteko azkena, udarekin batera atsedenaldia hartuko dutelako irailean indarberrituta itzultzeko. Indar berrituta eta protestak gogortuta itzuliko dira, hala iragarri dute gaur .
Gipuzkoako Foru aldundi berria eratzerakoan, Markel Olano Ahaldun Nagusiak promesa ugari egin dituela esan dute, “lau egoitza berri, eta 500 plaza adinekoentzat. Pasa den agintaldian, berriz, agindu bai, agindu zuten egoitza berri bakar bat bera ere egin ez dutenean”. Propaganda gutxiago egin eta irtenbideak emateko exijitu dute bildutakoek, “oso urrun baitaude gure 1.080 euroko gutxieneko pentsioak eta beste eskaerak”.
Erresidentzietako langileak greban direla gogorarazi dute, “politikoek promesak bai, baina eguneroko bizitzan murrizketak baino ez dituzte ezartzen”. Dirua nahikoa dagoela pentsioak bermatzeko eta hobetzeko esan dute, “nahikoa da aberastasunaren %13 horretra bideratzea, Europako beste estatuek egiten duten bezala”. Pentsio publikoen iraunkortasuna bermatzeko borondate politikoa baino ez dela behar nabarmendu dute, baita iruzur fiskalari eta ustelkeriari aurre egiteko zerga sistema progresiboa abioan jartzeko ausardia ere, “hortik jo behar dute pentsionisten arazoak konpondu nahi badituzte”.
Osakidetzan ere sendagileak lanuzteak egiten ari direla ekarri dute gogora, “horretan ere murrizketak nagusitzen ari dira eta gaixo bakoitza artatzeko duten denbora murriztu diete eta ezin dute atentzio duina bat eskatu. Zaintzen gaituztenak zaindu behar ditugu, eta beren borroka babestera deitu nahi dugu”. Horretarako sinadurak biltzeko mahaiak jarri ditu Duintasunak.
Orain arte lortutakoa mobilizazioei esker izan dela esan dute bestalde, “baina asko gelditzen da egiteko, Hego Euskal Herrian 825 euroko pentsioetara heltzen ez direnak 225.000 pertsona direnean, eta hauen zati handi bat 650 euro baino gutxiago jasotzen dituztenean”. Horren harira, irailetik aurrerako mobilizazioak biderkatu eta indartu egingo dituela iragarri du Duintasunak beste talde eta sektore sozialekin batera: “Langileak, emakumeak, gazteak, koordinatuta arituko gara, erantzun zabala, beharrezkoa eta anitza emateko pentsio duinak eta jendarte gehiagoari eragiten dieten eskubideak bermatzeko”.
