Ilusioz prestatutako 130 ekintzekin datoz madalenak
Jai batzordeak ostiralean agerraldia egin zuen. Herri bazkarirako txartelak, eta jaietarako zapiak salgai dituzte.
Jai batzordearen aurkezpena, ostiralean.
Hainbat hilabeteetan ilusio handiz eta auzolanean landutako 130 ekintzekin osatu du Jai Batzordeak madalenetako programa. Azken urteetan bezala, herritik sortu dute herriarentzat eta tartean askotariko eta din guztietako herritarrei begirako ekintzak prestatu dituzte: erakusketak, dantza, antzerkia, danborradak, lehiaketa eta dastaketa gastronomikoak, kirol jarduerak eguneko zein gaueko programa osatzeko, eta 25 kontzertutik gora.
Ostiralean agerraldia egin zuten jai batzordeko hainbat ordezkarik. Madalenak hilaren 21ean 19:00etan egingo dute eztanda txupinazoarekin, baina aurretik elkarlanaren lehenengo topagunea den herri bazkaria egingo dute 14:00etan Herriko plazan. Bertan parte hartzeko txartelak salgai daude jada hilaren 12ra arte 15 euroan helduentzat eta 10 euroan haurrentzat, Reyna tabernan eta Xera Gastrotekan, eta aukeran menu beganoa izango da aurten. Horretarako mezua bidali beharko da behin tiketa erosita denean honako helbidera.
Zapiak ere salgai jarri dituzte dagoeneko, 6 euroan eta herri osoko 26 saltoki eta tabernetan eskura daitezke.
Hiru txupinazo
Egitarauaren gaineko zehaztapenik ez zuten eman jai batzordeko kideek, bai ordea, aurten ere txupinazoa bizitzeko aukera ezberdinak izango dituztela herritarrek. Hala, txikienei begira mila koloretako txupinazo txikia egingo dute kantu propioarekin, gazteei begirako holi txupinazoa, pantaila erraldoia Zumardian txupinazoa lasai jarraitzeko, eta txupinazoa zuzenean Herriko plazan. Azken horretarako igoera antolatu dute Foru plazatik abiatuta 18:15ean, “adin guztietako herritarrei begirakoa da eta igoera animatua izango da, gainera”.
Streaming bidez ikusteko aukera ere izango da.
Jai batzordeak guztion gozamenerako jaien aldeko apustua egina duela azaldu zuten, “denok jaiez libre gozatu ahal izatea nahi dugu, eta horri begira, eraso sexistarik gabeko madalenak helburu dituzte neurriekin bat egin dugu, emakumeek ez dutelako ausartak izan behar, libre baizik”. Gaueko autobus zerbitzua izango dela ere jakinarazi zuten eta jai guztietan, halaber, 650 407 858 arreta telefonoa 24 orduz izango dela erabilgarri., edozein eraso sexista jasoz edota ikusiz gero deitzeko.
jaiak prestatzen gozatu duten adina gozatuko dutela festak bizitzen gaineratuta, herritarrek ere hala goza ditzaten espero dutela esan zuten jai batzordeko ordezkariek: jaiak marraztuz, jaietan parte hartuz, jai herrikoiak biziz”.
