[Galeria] Gazte Eguna laranjaz jantzi dute aurten
Kamiseta zuria etxean utzi eta laranjaz jantzi dira gaur Antxoko gazteak, eta ez hain gazteak. Urtero legez, bazkari herrikoia egin dute Gure Zumardian.
Umore onik ez da falta gaur Antxon Sanferminen bigarren egunean, Gazte Eguna ospatzen ari dira antxotarrak. Ausartenek dianarekin hasi dute eguna eta dirudienez, luze joko du egunak.
Egunaren lehen orduak, gazteenentzat izan dira, tailerrak eta jolasak egin baitituzte Gure Zumardian. Jarraian, Erraldoi eta Buruhandien Konpartsak herria zeharkatu du bigarren egunez, jendea gosez joan zedin bazkaltzera.
15:00tan hasi da ohiko Gazte Bazkaria, jai luze baten lehen urratsa. Kamiseta laranjek Topagunea zein elizako arkupeak guztiz bete dituzte. Entremes eta arrozarekin bete dituzte sabelak, egunari aurre egiteko indarrak beharko dituzte eta. Elektrotxaranga bazkaldu ondorengoa girotzen ari da dagoeneko. Egun luzea dute aurretik, baina argi dago gogotik eutsiko diotela jaiari.
HITZA Gazte Bazkarian izan da eta honako argazki hauek bildu ditu.
