Udal langileek balorazio mahaia behingoz eratzea eskatu dute
Ezohiko udalbatzarra egin dute gaur goizean Pasaian. EH Bilduk berriz ere salatu du elkarlanerako proposamena ez dutela aintzat hartu PSEk eta EAJk.
Balorazio mahaiaren osaketa exijitu dute berriz ere udaleko langileek. Goizean bildu dira udalbatza osatzen duten lau alderdiak ez ohiko batzarrean. Udako goiza izanagatik ere, udaleko hainbat langilek ez dute hautsien aurrean protesta egiteko aukera galdu. Eskari zahar batekin joan dira langileak; balorazio mahaiaren osaketa. Langileek gogorarazi diete, joandako legealdiko azken udalbatzarrean eskari bera egin zutela eta eskuartean duten gaia, larria dela. Aitor Oteizak, konpromisoa hartzeko eskatu die alderdiei, langile guztien izenean, “azken batzarrean hiru alderdik bat egin zuten gure proposamenarekin, eta espero dugu laugarren alderdiak ere gauza bera egitea”.
Gaia geldituta dagoela iritzita afera jorratzeko data zehatz bat eskatu du Oteizak, “posible balitz, uda ostean, irailean, bilera bat adostu nahiko genuke.
Udalbatzarrari dagokionez, EH Bilduk berriz ere salatu du udal gobernuaren jarrera, elkarlanari muzin egiten baitio. 5. puntuak eragin du EH Bilduren kexua, “udal eraketa aurretik eta udal eraketaren egunean bertan elkarlanerako deia egin genuen, herri akordioren baitan ordezkaritza adostua izan behar zuela ulertzen dugulako. Adostasunik egon ez denez, kontra bozkatuko dugu”, adierazi du Junkal Mintegia, Pasaiako EH Bilduko buruak.
Bestelako gaiei dagokionez, ez dira desadostasun handirik egon alderdien artean. Aurrekontua Gauzatzeko Arauaren aldaketa eta dedikazioa duten karguen zerren onartzerakoan, Ahal Duguk eta EH Bilduk abstentzioa eman dute.
