[Galeria] Oiartzun Irratiak entzuleak, lagunak eta maitaleak ditu (...eta asko gainera)
Oiartzun Irratia 20 urte bete dituelako egun osoko ospakizun festa egiten ari da. Uhinetan bezala, kalean ere oiartzuarren babesa jaso du.
Kontzejupean egin dute herri bazkaria. Kalera atera da gaur Oiartzun Irratia. 20 urte bete ditu. Bi hamarkadak oiartzuarrekin konpartitu nahi izan ditu hedabideak, eta bertako esatariak, aurretik irratia sortu zutenek, edo 20 urte hauetako uneren batean era batera edo bestera lagundu dutenek, gozatu ederra hartu dute. Konturatu direlako irratiak entzule asko bakarrik ez, lagun eta maitale asko dituela. Maitale onak, gainera. Hori demostratuta geratu da gaur egiten ari diren festa egunean. Herria ondoan izan dute.
Done Eztebe plaza estudio handi bilakatu dute. Egunerokoan hitzez egiten dutena, ekintzetara pasatu dute irratiko arduradunek. Ederki asko. Gutxi batzuk esatarien ahotsei aurpegia jarri diete; gutxi batzuk esan dugu irratiko kideek egunerokoan, ez uhinetatik bakarrik, harremana dutelako oiartzuarrekin, zuzenekoa, ia ukituzkoa. Nabaria da hori. Gaur begien bistan gelditu da.
Musika, zuzeneko irratsaioa, haurrentzako txokoa, herriko beteranoen eta gazteen arteko herri kirol desafioa, Olarriko kideen dantzaldia… Horiek goiza girotzeko osagaiak. Ondoren (bertan izan da HITZA), jada tiketak agortuta zeuden herri bazkaria, herriko elkarteek egindako jaki goxoekin, eta bertsolariekin (Iraitz Mateo, Jon Diaz de Mendibil, Jon Martin eta Josu Ibargure).
Eta arratsaldean, Irati Ordiozola, Ane Badiola eta Joxe Leon Kazabonekin kantaldia, bingoa, Tio Teronen Semeen ikuskizuna (17:30), eta eguna bukatzeko, 22:00etan eta Hipatiaren lorategian, Lartaun Abesbatzaren emanaldia.
Eskerrik asko Oiartzun Irratia. Gaurkoagatik, bi hamarkada hauetako guztiagatik, eta etorriko den denarengatik. Ondokoak, eguerdi aldean HITZAk jaso dituen irudiak dira.
