Euskal itsas ondarea Galiziara eraman du Albaolak
Asteburuan ospatu dute A Guardan (Pontevedra) Ontzi Tradizionalen XIV. Topaketa eta Albaolakoak bertan izan dira, galiziarrekiko duten elkartasun eta lankidetza berretsiz.
Asteburuan zehar, beste garai bateko ontziak eta teknikak ikusgai izan dira Pontevedrako A Guarda herrian, bertan antolatu baitute aurten Ontzi Tradizionalen Topaketaren XIV. edizioa. Albaolak eskarmentua du ibiltaria den eta bi urtero antolatzen den topaketan, izan ere, bi aldeen arteko lankidetzak eta adiskidetasunak bi hamarkada baino gehiago ditu. Hartu-emana bientzat aberasgarria izan delakoan, galiziar eta euskal herritarren arteko erlazioa ezin hobea dela nabarmendu dute. Albaolak gainera, 2020ko maiatzaren 28tik ekainaren 1era ospatuko den Pasaiako Itsas Festibalaren promozioa egin du, eta oroitarazi dute, iaz galiziarrak izan zirela ohorezko gonbidatuak.
Euskal itsas ondareak tarte nabarmena izan du ostegunetik igandera bitarte egindako topaketan. Lurreko Stand bat izan du Albaolak eta bi ontzi eta gailu bat erakutsi dituzte gipuzkoarrek. Aprendiztegi, Lance Lee Nazioarteko Ontzigintza Eskolan egindako sokagintza makina bat eraman dute, Hondarribian sortutako azken makinaren erreplika hain zuzen ere. San Juan baleontziaren sokak egiteko erabiliko dute makina hori.
Bestalde, Arditurri potina eta Ameriketatik euskal diasporaren diru laguntzekin eratutako trainerua, A Guardako uretan nabigatu dute. Ostiralean Danny Sheehy poeta irlandarra omendu zuten arraunak altxatuz eta une batez isilunea eginez. 2017an, Naomh Gobnait ontzi tradizionalean, Miño ibaiko bokalean nabigatzen ari zela zendu zen Sheehy.