[Galeria eta bideoa] Marinelen danborrada, karmenen egun handian
Karmengo Amaren eguna da, hortaz Trintxerpen egun handia dute gaur. Alaitasunez eutsi diote trintxerpetarrek jaien azken orduei.
Gaurkoa 2019ko karmenen azken danborrada izan da. Trintxerpen danborradak gustuko dituztela ukaezina da, nahi bezain beste topatu daitezke barrutiko jaietan. Gaurko danborrada ordea, marinelena, jaietan Trintxerpeko kaleetan zehar ibiliko den azkenekoa izan da, agerian utziz ordu gutxi falta direla karmenei gero arte esateko.
Karmengo Amaren eguna, sentiberatasun handiz bizi dute trintxerpetar ugarik, barrutiak itsasoarekin izan duen harreman estuagatik. Askorentzat unerik bereziena, Karmengo Ama uretara jaisten duten unea da. Gaur ere hala izan da.
Arratsaldean gogor jo du eguzkiak, hezetasunak gainera, ez du giroa erosoagoa egin. Baldintza horietan, Trintxerpeko kaia ez dirudi freskatzeko lekurik onena denik. Hala ere, hamarnaka herritarrek ez dute huts egin eta danborrada zein Karmengo Amaren atzetik joan dira, ilusioz josita. 17:00tan abiatu dira, Trintxerpeko elizatik eta handik hospitalillo kaira jo dute.
Kaian bertan bideak banatu dituzte Karmengo Amaren irudiak eta danbor joleek, baita atzetik zituzten herritarrak ere. Karmengo Ama ontzira lekura eraman dute, kontu handiz eta ontzi batera igo dute, herritar gutxi batzuekin batera. Danborradako kideak bestalde, banan-banan igo dira Mater Itsasontzi Museoan badiari itzulia emateko. Hala ere, badiakoa atsedena baino ez da izan, Mater Museoak kaian utzi bezain pronto, barrutian zehar jotzen segi baitute, berriz ere elizara iritsi arte.
HITZA Marinelen danborradan izan da eta honako irudi hauek bildu ditu.
