Korta, San Juanera
Arraun elkarteak baieztatu du sasoia bukatu arte 'Erreka' ontziaren entrenatzaile izango dela Ortzaikakoa. Juan Mari Etxaberen lekukoa hartuko du.
Jose Luis Korta. Argazkia: Karkara Aldizkaria. Jose Luis Korta (Ortzaika, Orio, 1949), San Juango Senior Mailako gizonen entrenatzaile izango da denboraldia bukatu arte. Hau da, Erreka ontziaren prestatzailea izango da. Arraun elkartea eta entrenatzailea ados jartzen badira, aukera dago harremana luzatzeko. 22 urte dira Kortak ez zuela Gipuzkoako talde bat entrenatzen.
Albistea arraun elkarteak sare sozialen bidez baieztatu du. Jakina da azken egunetan klubaren eta Kortaren arteko hurbilpena eman zela, eta gauzatu egin da. Horrenbestez, Juan Mari Etxaberen lekukoa hartuko du Kortak.
Aitor Manterola Berria egunkariko kazetariak jaso duenez, arraun munduan ez da ohikoa entrenatzailea uda erdian aldatzea, denboraldi garai bete-betean, baina San Juanek neurri beharrezkotzat jo du. Beraz, Juan Mari Etxaberen lekua beteko du Kortak. Bada bitxikeria truke honetan, duela hamahiru urte alderantzizkoa gertatu zelako bien artean: Kortak Castron ez zuela jarraitu behar erabaki zuen zuzendaritzak, eta han arraunean zebilen Etxabek ordezkatu zuen.
Antza, Etxabek berak hots egin zion Kortari joan den astean entrenatzaile izateko aukera emanez, klubaren oniritziarekin. Errekak-k bultzada behar duela uste dute San Juan-Koxtape Arraun Elkartean.
Nabarmantzekoa da, aldi berean, Jose Luis Kortaren aita sanjuandarra zela.
Jose Luis Kortaren ibilbidea, arraunlari eta entrenatzaile bezala
- 1968-72, Orio
- 1973-75, Lasarte Michelin
- 1976-1987, Kaiku
- 1988-91, Zierbena
- 1991-97, Orio
- 1998-2006, Castro
- 2008-2018, Kaiku
- 2019-…, San Juan
