Trafiko aldaketak, madalenen harira
Madalenen harira, trafikoan, aparkalekuan, autobus zerbitzuan eta kale igogailuen zerbitzuan aldaketak izango dira.
Touring etorbidea itxita dago atzotik trafikoarentzat, barrakak muntatzen ari dira bertan. Madalenen harira, trafikoan, aparkalekuan, autobus zerbitzuan eta kale igogailuen zerbitzuan aldaketak izango dira. Hainbat kale trafikoarentzat itxiko dira, honakoak zehazki: Touring etorbidea atzotik itxita dago barrakak jartzeko, eta hilaren 28an zabalduko dute berriz ere. Nafarroa hiribidea, hilaren 21ean itxiko dute 06:30ean, Galizia (Niessen) eta Santa Klara biribilguneen artean postuak muntatzeko. Halaber, eremu horretan hilaren 20ko 23:00etatik aurrera debekatua egongo da aparkatzea.
Hiri barruko eta hiri arteko garraiobide lineatan ere izango du eragina. Hiri barruan, Xenpelar eta Morrongilleta kaletako geltokiak Tulle kaleko geltokira lekualdatuko dituzte (Ermita ondoan) hilaren 21eko 07:00etatik hilaren 26ko 07:00ak arte. Bertan behera utziko dituzte halaber, Niessen, Zumardia eta Gabierrotako geltokiak.
Hiri artekoei dagokienean, Lurraldebusen E02, E04, E20, E26, E27, E72, eta E77 lineak Galizia birbilgunetik Lartzabaleraino zuzenean joango dira, eta alderantziz, Nafarroako hiribidea itxita izango delako, hilaren 21eko 06:30etik hilaren 26ko 13:00ak arte. Beraz, Zumradia, Gabierrota eta Lartzabalgo geltokiak bertan behera geldituko dira.
Gaueko autobus zerbitzua
Jaietan gauero auzoetarako autobus zerbitzua martxan izango da, bestalde, aurten ere. Hitzartutako tarteko geltokiak ere izango dira, gainera. Trafiko mozketak hainbat garajeri eragingo die eta erabiltzaileak azken urteetan bezala sartu eta irtengo dira. Argibiderik behar izanez gero Udaltzaingora deitu dezakete. Taxiek ohiko geltokia izango dute, Nafarroa hiribideko 69an. halaber, jaietan zehar beste geltoki bat jarriko da Santa Klara biribilgunearen parean, Nafarroa hiribidean.
Tao zerbitzua eten egingo dute hilaren 20ko 13:30etik hilaren 26ko 09:30era, eta Merkatuzarreko aparkalekua itxita egongo da hilaren 19tik 25era. Hainbat aparkaleku egokituko dira halaber jaien harira, bi zehazki, hilaren 21etik 25era, Telleri Alde ikastetxean bata, eta Lousada kalean, Arramendi Parkerako sarbidean, bestea.
Trafikorako itxitako gune guztiak 08:00etatik 12:00etara irekiko dituzte zamalanetarako. Ordutegi horretatik kanpo ez zaie ibilgailuei sartzen utziko.
jaietan zehar, programan aurreikusitako ekitaldiak direla eta , su artifizialak, danborradak, konpartsak eta abar, litekeena da trafikoa puntualki moztea. Kasu horietan ahalik eta motzenak izango dira mozketak, ekitaldirako behar-beharrezko denbora baino ez, eta ahalik eta eragin txikiena sortzeko saiakera egingo dela azaldu du udalak.
Kale igogailuak
Kale igogailuen zerbitzu ordutegia zabaldu egingo du udalak, bestalde, jaien harira. 03:00ak arte izango dira zabalik hilaren 20ko gauetik aurrera eta hilaren 26an berrezarriko da ohiko ordutegia.
