[Galeria] Txorizo egosiak bezala
Gaur, Errenteria-Oreretako madalenetan, Kuadrillen eta Erretiratuen Eguna. Kuadrillek bazkaria egin dute Agirre Lehendakariaren plazan, bero handiarekin.
Izugarrizko beroarekin, baina lagunartean gozo. Gaur, Errenteria-Oreretako madalenetan, Kuadrillen eta Erretiratuen Eguna. Kuadrillen kasuan, #u23. Elastiko gorriekin jantzi dira lagunarteen jaia ospatzeko oreretarrak. Eta beroa ari du. Handia. Gorria, eta beroa: txorizo edo lukainka egosia. Barka norbaiti konparazioa gehiegizkoa iruditu bazaio.
Kuadrillek txupinazoa egin dute, eta jarraian, etxetik eramandakoarekin (makarroiak eta arroza nagusi, baita otartekoak ere) bazkaria Agirre Lehendakariaren plazaren inguruan, madalenetan Lino gunea dena. Itzala. Altxor preziatua gaurkoa, baina edonola ere, ez nahikoa. Itzalean ere ia 40 graduek ez zutelako barkatzen.
Eta horren aurrean, zer? Lehenik eta behin, pazientzia. Ondoren, irribarrea. Eta jarraian, freskatzeko era guztietako tramankuluak: ura botatzeko askotariko gailuak (pistolak, metrailetak, flis-flis erako ur jaurtitzaileak, abanikoak, elastiko kentze bat edo beste…)… Antolatzaileek ur aspertsore inprobisatua ere prestatu dute. Kale saltzaileak, nola ez, pozik, salmenta ederra egin dute.
Ajeari aurre egiteko egun ona ez gaurkoa. Izan dira, asko gainera, eguna luze joango zela jakitun, urez busti dituztenak zintzurrak. Diotenez, hidratatzeko modurik eraginkorrena da hidrogenoa eta oxigenoa nahasten dituen likidoarekin zurrut egitea. Arratsaldean zehar hidratatzeko moduan aldaketak egongo dira, ziur.
Jarraian, HITZAk bazkariaren hasieran jaso dituen irudiak. Txorizo egosienak.
