[Galeria] Urtzeko beldurrik ez dute
Kontzertuen atalean, Seguridad Social Zumardian, Roba Estesa Lino gunean, eta Joxpa Erromeria Panier gunean izango dira gaur.
Ur jolasak egin dituzte Foru plazan. Beroa. Hori jai giroarekin aurtengo madalenetan, momentuz behintzat, protagonista. Bero ikaragarriak ordea ez ditu kikildu jai giroaz gozatu nahi dutenak, handi eta txiki, eta gaur goizean lasterka ibiltzen animatu denik ere izan da. EAJk antolatzen duen urteroko madalenetako haur krosean 55 lagunek eman dute izena.
Foru plazan berriz, beroari aurre egiteko jarduera ezin hobea izan dute ere txikienek: ur jolasak. Inbidiaz begira izan dituzte guraso eta aiton-amonak, bainu jantzia soinean urarekin gozatzen aritu diren haurrak. Baina Maialenek eta Xantik badituzte jarraitzaile porrokatuak; hotza ala beroa, atzetik dantzan segitzen dituztenak. Zer esanik ez buruhandien eta horien maskurien kolpetatik ihesi ibiltzen diren gaztetxoak. Gorriak ikusi dituzte gaur ere buruhandien kolpeak libratzeko, eta beroago etxera ez itzultzeko.
Herriko Plazan izan dira, gainera, adinekoen egoitzetako erabiltzaile batzuk Gurutze Gorriak lagunduta. Beraientzako kontzertua eskaini diete trikitilariek, eta Maialenek eta Xantik ere dantzatu diete.
Arratsaldean pilota egokituko partidak izango dira Agustina Otaola pilotalekuan, baita Kiki, Koko eta Moko pailazoak ere Koldo Mitxelena plazan , edota gazteen zein helduen dantza solteko txapelketak. Danborradak ere beteko ditu bere burrunbarekin kaleak gaur, eta kontzertuen atalean berriz, Seguridad Social Zumardian, Roba Estesa Lino gunean, eta Joxpa Erromeria Panier gunean.
