Lezoko hainbat espaloi berritzen ari dira
Lezoko Udala eraberritze lanak egiten ari da herriko hainbat espaloitan. Lopenen jada eginak dituzte, eta aurki Zubitxo inguruan hasiko dira.
Lezoko Udalak jakinarazi du herriko hainbat kaletako espaloiak berritzen ari dela. Lopene ingurukoetan eginak dituzte jada berritze lan horiek, eta Zubitxo kalean aurki ekingo diete lan horiei. Horiekin udan jarraituko dutela adierazi du udalak, herriko beste esparruetara zabalduz. Irisgarritasuna hobetzeko eta oinezkoentzat espazio egokiagoak izateko obrak dira, udalaren arabera.
Lanak Udal Enplegu Planaren barruko beharginak egiten ari dira. Bertan, Lanbiden izena emandako lezoarrak ari dira, haiei enplegu aukera berriak sortuz eta eskainiz.
Horrez gain, udalak lore berriak jarri ditu herriaren erdigunean nahiz udaletxean.
