[Galeria eta bideoa] Epelean hasi dira Santioak
Aurten haurren dantza saioak eta 'flashmob' herrikoiak girotu dituzte txupinazoaren ondorengo lehen uneak.
Aurten Odol Emaile Taldeko kideek jaurti dute txupina. Iragarritakoa bete zen, atzokoa arratsalde bero eta hezea izan zen, azala busti eta itsaskor uzten duen horietakoa. Baina Pasai Donibaneko herritarrak ez ziren etxean gelditu, eta edari freskoekin ongi hornituta, Santiago plazan bildu ziren herriko jaien hasiera ospatzeko.
Aurtengo txupinazoa Pasai Donibaneko Odol Emaile Taldea kide Loli Castiñeira, Jaione Salaberria, Maria Jose Egiluz eta Juana Luisa Barbaren eskutik etorri zen. Dena dela, txupinazoak jaien hasiera berretsi baino ez zuen egin, jaia bazkalorduan egin baitzen.
Gazte bazkaria egin zuten atzo, plazan bertan eta jandakoak ongi digeritzeko Zo-Zongo perkusio taldeak erritmo dantzagarriak ekarri zituen arratsaldean.
Flashmobean ere dantzatu behar izan zuten, kasu honetan Guadalajara hiriko doinu mexikarrei jarraiki. Ikusleak azkar bildu ziren dantzaldi polit eta arin horren inguruan.
HITZA atzoko txupinazoan, hona hemen arratsaldeak utzitako irudiak.
