Amaierarik onena eman dio ligari San Juan-Koxtapek
San Juan-Koxtape Arraun Elkarteak ezustekoa eman du asteburuan larunbateko bi banderak irabazita. Igandean berriz, batelerak arrakastari eutsi eta bigarrenak izan ziren Errenteriako uretan, Hibaikaren atzetik.
Denboraldiko azken asteburuan iritsi dira banderak Donibanera. Argazkia: San Juan-Koxtape A.E. Sasoiari bukaera bikaina eman diote San Juan-Koxtape Arraun Elkarteko arraunlariek, eta denboraldian zehar etengabe gora egin dutela berretsi dute. Larunbatean, Bilboko Ibaizabalen jokoan ziren bi banderak bereganatu zituzten arrosek.
Eguneko lehen ezustekoa, bateleren eskutik etorri zen, lehia estu baten ostean, Hibaika, ETE ligako liderra, mendean hartzea lortu baitzuten. 10 minutu eta 53 segundoan burutu zuten ibilbidea sanjuandarrek, Hibaikak baino bi segundo gutxiago.
KAE1 ligako azken estropadan lortu zuten ligako lehen garaipena Jose Luis Kortaren mutilek. Zarautz eta Deustuko traineruak ez ziren fin ibili, eta aukera ezin hobeto baliatu zuten Pasai Donibaneko arraunlariek Getaria eta Donostiarra, atzean utziz. Aldaketa asko emandako urtean, opari polita eskaini zioten arraunlariek zaleei. Guztira 20 minutu 23 segundo arrosentzat eta denboraldiko sailkapen orokorrean, bosgarren postua.
Larunbatean, KAE2 ligako azken estropada ere egin zen, Colindresen (Kantabria). San Juan-Koxtapeko bigarren traineruak, podiuma osatzea lortu zuen, hirugarrenak izan baitziren, Orio eta Portugaleteren atzetik hurrenez hurren.
Igandean Emakumeen Traineruen Elkarteak antolatutako ligaren azken estropada egin zen, Errenteria-Oreretan eta hura ere zorionekoa izan zen batelera gazteentzat. Bilbon garaile izan ostean, bigarren izan ziren Guruzne Azpirozek zuzenduriko arraunlariak. Estropada 11 minutu eta 2 segundoan burututa, Hibaikak ez zuen aukerarik eman etxean. Beheko postuetan hasi ostean, sailkapen orokorrean bosgarren postuan bukatu dute denboraldia.
Sasoi gorabeheratsua izango zena, uste baino hobeto bukatu da zale askorentzat. Zailtasunak zailtasun, behetik gorako ibilbideari eutsi diote San Juan-Koxtapeko tripulazioek eta lehia duina eman dute.
