Play offean borrokatzen jarraituko du San Pedrok
Amaiera epikoa izan da Sanpedrotarra Arraun Elkartearena Eusko Label Ligan. Azken asteburuko azken estropadan lortu dute playofferako sailkapena eta Astillerok zuzenean galdu du maila.
San Pedroko arraunlariak Bueun, bigarren postua lortu ostean. Argazkia: Sanpedrotarra K.E. Gutxitan ospatu du hain beste herri batek, sailkapenean azken aurreneko postuan bukatu izana. Kasu honetan baina, azken aurrenak amesten jarraitzeko aukera izango du. Azken unean aurrera pausua eman du San Pedrok eta play offean izango da, gaur egun maila gorenean duen postuari eusteko. Sasoi guztian zehar gogor borrokatu ostean, lasaitu ederra hartu dutela adierazi du Mikel Arostegi entrenatzaileak, “asteburu gogorra joan zaigu, arlo fisiko zein psikologikoan presio handia jasan dugu, baina lortu dugu nahi genuena eta oso pozik gaude egindako lanarekin”.
Eusko Laben Ligan aritzeko taldea hutsetik sortu behar izan dute moreek, eta sasoiaren atarian maila galtzeko hautagai argiak ziren. Apaltasuna eta talde sena izan dira gakoak. “Hasieratik bagenekien behean ibiliko ginela borroka eta horretarako egin dugu lan. Tripulazioko kideen artean harreman oso ona izan dugu gainera eta uretan gustura aritu gara orokorrean”, esan du Arostegik.
Urteko azken bi estropadak Galizian jokatu dira, Bueun (Pontevedra) eta Boiron (Coruña). Azken postuan hasi zuen Libia-k asteburua, baina lortu zuten egoera iraultzea. Larunbatekoa finala izan zen moreentzat eta estropada osoan zehar lehia bizian aritu ziren Astillerorekin, haien arerio nagusiarekin, alegia. Lehen txandako azken metroetan dena eman zuten Kalparrako arraunlariek eta kantabriarrak mendean hartu zituzten. Amaiera benetan estua izan zen Bueukoa, 4 ehuneneko tartea besterik ez bi traineruen artean.
Boiron ez ziren hain ongi moldatu Mikel Arostegiren arraunlariak. Hirugarrenak izan ziren eta Astillero bigarren. Eusko Label Ligako sailkapen orokorrean, puntu kopuru berbera bildu dituzte bi elkarteek, 37. Dena dela, moreek puntuen aldea irabazita zuten ligan zehar Astilleroren aurretik maizago sailkatu direlako moreak aurreko estropadetan, kantabriarrak sanpedrotarrak baino. Eta horrenbestez play offean parte ahalko dute irailaren 14 eta 15ean.
Sasoiaren atarian argi zuten San Pedrokoek denboraldia, luzea eta zaila izango zela, eta aurreikusitakoa bete da. Baina ez dute amorerik eman eta gutxirekin asko egin dezaketela frogatu dute. Arostegik argi du play offean borrokatzen jarraitu beharko dutela, “datozen estropadak gogorrak izango dira, gauzak oso ondo egin beharko ditugu maila mantentzeko”.
