Begirale ikastaroan izena emateko epea zabalik jarraitzen du Pasaian
Irailaren 13ra arte izena eman ahalko da begirale ikastaroan. 18 urtetik gorako pasaitarrentzat zein Pasaiako elkarteen kideentzat doakoa izango da.
Begiralea ikastaroan urrian hasiko da eta Trintxerpeko euskaltegian egingo dute. Pasaiako Udalak aisialdi begirale izateko ikastaroa egingo du irailaren 28tik aurrera eta jakinarazi du, nahi dutenek izena emateko aukera izango dutela irailaren 13ra arte. Deialdia 18 urtetik gorako pertsonei zuzenduta dago eta udalerriak dituen bi beharri erantzuteko antolatu dute: Pasaiako hainbat elkarteko begiraleen erreleboa hartzea eta gazteen hizkuntza eskubideak bermatzea, begirale euskaldun gehiago sortuz.
Ikastaroa doakoa izango da Pasaitarrentzat eta pasaitar ez izan arren, Pasaian haur eta nerabeekin lan egiten duen elkarte bateko kide direnentzat. 200 euro ordaindu beharko lituzkete matrikulazioa egiterakoan, baina diru kopurua osoki itzuliko litzaieke ikastaroa amaitzerakoan. Gainontzekoentzat matrikulazioaren prezioa 445 eurokoa izango da.
Ikastaroa Trintxerpeko euskaltegian egingo dute eta Urtxintxa eskolak kudeatuko du. Euskara hutsean izango da eta larunbatero egingo dute, goizez, urritik ekainera arte. Guztira, 150 ordu teoriko eta 160 praktiko izango dira.
Ikastaroa burututakoan, ikasleek Eusko Jaurlaritzak homologatutako Haur eta Gazteen Aisialdirako Begirale titulua jasoko dute.
Argibide gehiago 943 344034 telefonoan, edota eskubidean@pasaia.net.
