Gaxuxak prest ditu ikasturte berrirako jarduerak
Jardueretan izena emateko aukera irailaren 2 eta 3rako jarri dute Lezoko emakume taldeko kideek. Ikasturtea urriaren 1ean hasiko dute.
Egindakoekin urtero erakusketa antolatzen du Gaxuxak. Lezoko Gaxuxa Emakume Taldeak prest ditu ikasturte berrirako jarduerak. Mamitsu datoz gainera. Gorputza, garuna eta sormena aktibatzeko adinako ikastaroak antolatu dituzte. Batzuk, sasoi osoko iraupena dute (eskulanak, soinketa, yoga, laboreak, patchwork, pilates, Sasoitu zure garuna saioak…), eta beste batzuk epe laburragoa dute, adibidez, elikadurakoa (urtarriletik apirilera) eta ahalduntzea. Ikastaroak urriaren 1ean hasiko dira
Horietan izena emateko epea jakinarazi du, aldi berean, Gaxuxak. Hala, irailaren 2an eta 3an eman behar dute izena interesdunek, 10:00etatik 12:30era goizez eta 17:00etatik 19:00etara arratsaldez, taldeak Hipolito Gezala kalean duen egoitzan.
Ikasturte osoko jarduera bakoitzaren prezioa 70 eurokoa da lezoarrentzat, eta 80koa Lezon bizi ez direnentzat. Jarduera puntualen prezioa, hau da, elikadura eta ahalduntze ikastaroena, 15 (20 kanpokoentzat) eta 20 eurokoa (25 lezoar ez direnentzat) da hurrenez hurren.
Edonola ere, izena emateko ordutegian edozein zalantza argitzeko prest daude Gaxuxakoak.
Jarduera horiek Lezoko Udalaren laguntza dute.
