Xorrola Mugi sisteman sartuko da astelehenean, deskontuekin
Gainerako garraiobideek duten hobariak jasoko dituzte Mugi txartela erabiltzen dutenek. Beste urrats bat eman dute, garraioa saretzeko.
Mugi txartela Xorrolan erabili ahal izango da astelehenetik aurrera (irailak 1), bere hobariekin. Ekainean Gipuzkoako Garraioaren Lurralde Agintaritzak (GGLAk) onartu zuen, Oiartzungo udalak otsaileko plenoan eskaera egin ondoren.
Orain arte, mugi txartela erabil zitekeen, baina hobaririk gabe. Sisteman sartzearekin batera, deskontu eta hobariez baliatzeko aukera izango dute. Mugi txartela pertsonalizatuta dutenek honako deskontuak jasoko dituzte: lehenengo bidaietan % 47koa; 21. eta 50. bidaien artean % 57koa; 51. bidaiatik aurrera % 90ekoa. Gainera, sisteman integratzearen ondorioz, gazteek doan bidaiatuko dute 51. bidaiatik aurrera.
“Urrats sendoa”
Xorrola beste garraiobideetara —Euskotren edo Lurraldebus— iristeko erabiltzen baldin bada, sistemak %75eko deskontua aplikatuko du txartel merkeenaren gainean. Alegia, txartel garestiena kobratuko da, eta bestearen %25 bakarrik.
GGLAk adierazi duenez, urrats sendo bat da lurralde osoko garraio sistema bateratzeko. “GGLAk garraio ereduaren iraunkortasun eta irisgarritasunaz arduratzeko duen egitekoarekin bat, egungo eta etorkizuneko garraiobide sareen eta zerbitzuen hobekuntzaren erakusgarri da Xorrolaren integrazioa”, adierazi dute.
