Beste urte batez, Txinalkak oihala irekiko du
Aurtengo ikasturterako matrikulatze epea irekita dago, hilaren 13ra arte. 18 urtetik gorakoentzako izango da, eta Tessa Andonegi izango da irakaslea.
Ikasturte bukaeran antzezlana taularatzen dute [Argazkia: Oiartzungo Udala]. Prest da Txinalka 2019/2020 ikasturteari hasiera emateko. Oiartzungo antzerki eskolan izena emateko epea zabalik dago, hilaren 13ra arte. Izen-emate orriak eskuratzeko, honako tokietara jo daiteke: udaletxera; Manuel Lekuona bibliotekara; Elorsoro kiroldegira; anbulatoriora; Amazkar, Makubi eta Kastro tabernetara; eta Garmendi txokolategira.
Ikasturtearen prezioa 60 eurokoa izango da oiartzuarrentzako. Kanpokoentzat, berriz, 80 euro. Ordainketa Laboral Kutxako kontu korronte honetan egin behar da: 3035 0126 60 1260900006. Dirua sartuta, egiaztagiria udaletxean edo Elorsoro kiroldegian aurkez daiteke.
Tessa Andonegi, irakasle
Azken hiru ikasturteetan bezala, Tessa Andonegi aktorea izango da irakaslea. Ikasturtea hilaren 18an bertan hasiko dute, Karaez kaleko 4 zenbakiko lokalean. Asteazkenetan elkartuko dira, 19:00etatik 21:00etara.
Informazio gehiago behar duena, e-posta bidez jar daiteke harremanetan Andonegirekin berarekin.
