Gosaririk gabe, baina jantoki beganoarekin itzuli da Mikelazulo
Lehen hitzordua, bihar izango da. 'Cerdo con monoculo' poesia liburua aurkeztuko dute bertan 18:00etan hasita Errenteria-Oreretako Noski liburu dendako lagunen eskutik. Sihara Nuño egileak berak aurkezpen errezitaldia egingo du, Alejandro Barronekin elkarlanean.
Mikelazulo elkarteak ikasturte berriari ekin dio. Oporrak amaituta, bueltan da Mikelazulo Kultur Elkartea, eta indar berrituta zabalduko ditu ateak sasoi berriari erantzuteko. Aldaketak iragarri ditu funtzionamenduan, eta lehenak ordutegiari dagozkio, ostiraletik igandera 16:00etatik 23:00etara izango da zabalik, eta goizez beraz ez du ikasturte honetan gosaririk eskainiko. Madalenetan 100 afaritik gora emanda, sukaldea indartzea erabaki dute eta hilean behin, urrian hasita, jantoki beganoa egingo dute.
Aldaketa gehiago ere izango omen dira, baina datozen asteetan emango dute horien berri arduradunek.
Sabela elikatzekoak bai, baina arima elikatzekoen berri ere eman dute. Mikelazulo zerbait bada, sorkuntza da, kultura, hausnarketa eta ideien laborategia, eta ezinbestekoa du kultur eskaintza. Horren harira, lehen hitzordua, bihar izango da. Cerdo con monoculo poesia liburua aurkeztuko dute bertan 18:00etan hasita Errenteria-Oreretako Noski liburu dendako lagunen eskutik. Sihara Nuño egileak berak aurkezpen errezitaldia egingo du, Alejandro Barronekin elkarlanean. Olerkigintza garaikidea maite dutenentzat ezin egokiagoa.
Hilaren 22an, berriz, musika eta zinema arratsaldea antolatu du Mikelazulok: Peru Galbete & Paxkal Irigoien. Lehenak Uraren oldea proiektua aurkeztuko du, eta bigarrenak, berriz, Gure sor lekua lehen euskal filmari (1956) eginiko soinu banda interpretatuko du, pelikula ematen duten bitartean.
