Herritarren ilusioa berpiztuz amaitu dute sasoia
Bukatu da bateleren trantsizio urtea. Kontxako ohorezko txandan, aurreko astean baino pattalago aritu arren, denboraldiari amaiera ona eman diote sanjuandarrek.
Ohorezko txandarako sailkatuz ezustekoa eman zuten aurreko astean San Juan-Koxtape Arraun Elkarteko kideek. Atzokoa urtean zehar egindako lanaren saria izan zen arrosentzat, onenekin aritu baitziren.
Kirol arloan, nahiko ahul aritu ziren Guruzne Azpirozek zuzendutako neskak. Ez ziren gai izan Orio, Arraun Lagunak eta Hibaikarekin lehiatzeko eta urrun izan zituzten estropada guztian zehar. 11 minutu eta 22 segundo behar izan zituzten atzo estropada burutzeko, lehen jardunaldian baino 26 segundo gehiago. Segundo horiek ondorioak izan zituzten, arrosek bi postu galdu baitzituzten sailkapen orokorrean (Hondarribia eta Donostiarrak aurre hartu zioten). Hortaz, seigarren postuan bukatu dute sanjuandarrek 2019ko Kontxako Bandera.
Hala ere, atzokoak ezin du azken asteetakoa ilundu. Bilbo Hiria bandera irabazteaz gain, abuztu osoan zehar podiumean izan ziren eta Kontxako sailkapenean, playoff eta Euskotren ligako hainbat talde atzean utzi zituzten.
Emaitzek are eta garrantzia gehiago hartzen dute, sanjuandarren denboraldiaren hasiera aintzat hartzen bada. Tripulazioa azken unean osatu zen 18 urte inguruko neskatoekin. Eskarmentu falta agerikoa zen. Urtea hasi eta berehala, sasoi gogorra zetorrela pentsatu zuten askok eta zale gehienek errepikatutako hitza “pazientzia” zen. Azkenaldian baina, pazientziak ilusioari bide egin dio.
Hurrengo urtean, ETE ligan jarraituko du San Juan-Koxtapek. Zalantza asko sortu dira, tartean blokeari eutsi ahalko dioten. Argi dagoena da, urte bakar batean, zaleen ilusioa berpiztu eta aurten aurrekari bat ezarri dutela. 2020an bide beretik jarraitu beharko dute.