Lehiarik gabeko kirola oinarri hartuta, Pasaia Kirol Badia Kluba sortu dute
DBH 1 eta 2. mailako nerabeei dago zuzendua eta kirol arloan dinamizatzaile berri eta ezberdina izatea da helburua. Izena emateko epea hilaren 30era arte izango da zabalik.
Kirol jarduera ezberdinak egingo dituzte PKBKn Kirola eta lehia sinonimoak dira maiz, baina lehia zintzoa izan beharrean gatazkatsu bihurtzen denean, kirolaren baloreak zentzugabeko bilakatzen dira. Pasaiako Udalak, bestelako kirol eredua proposatu nahi die herriko gazteei, nahi izanez gero, presiorik eta lehiakortasun toxikotik at dagoen eredua.
Kirola beste modu batean egiteko sortu du Pasaiako Udaleko Kirol arloak Pasaia Kirol Badia Kluba. Funtsean, lehiakortasun ala eredu formalarengan interesik ez duten gazteei bestelako irtenbidea eskaini nahi diete, kirolaren onurez baliatu daitezen.
Lehen urte honetan, Pasaiako ikastetxeetako DBH 1 eta 2ko ikasleei dago zuzendua, edota Pasaian ikasi ez arren, herrian erroldatuta dauden gazteei. Ikasturte osoko dinamika izango da PKBK, urrian hasiko da eta gehienez, ekainaren 15ean bukatuko dituzte gehienez, FinisherRaid izeneko dinamikarekin. Gaikako programa izango da, hau da, kirol jarduera ezberdinak egingo dituzte urte osoa zehar, tartean, eskalada, BTT, arrauna, akroyoga, arrantza, eskrima edota Parkour-a. Gainera sormena eta kirola lotzen dituzten jarduerak ere burutuko dituzte, hala nola, kirol argazkilaritza eta elikadura. Dena dela, programa ez da itxia izango, eta gaiak, gazteen nahi eta beharren arabera zehaztuko dira.
Kirol saioak, astelehenetik ostegunera izango dira, arratsaldez eta ordubeteko iraupena izango dute. Gai bakoitzak gutxienez bi saio izango ditu, eta gehienez, lau. Ahal den heinean, herriko azpiegiturak erabiliko dituzte, izan publiko ala pribatu eta herriko kirol eragileekin elkarlanean aritzeko asmoa dute.
Nahi dutenek Pasaiako Udaleko webgunean izena eman ahalko dute hilaren 30era are. Plaza guztiak beteko ez balira, baldintzak betetzen ez dituzten gazteak ere onartuko lirateke. Talde bakoitzeko 8 ikasle egon beharko dute gutxienez eta 16 gehienez. Bajen ondorioz, talde batean 5 parte hartzaile edo gutxiago geratuko balira, taldeko kide horiek beste talde batzuetan sartzeko aukera izango da, guztien artean adostua badago.
PKBKren hileko kuota, 24,44 eurokoa izango da. Hala ere, Gizarte Ekintza Sailak txostenen bidez ziurtatzen badu ikasleren batek gizarteratzeko beharra duela, eta haren familiak edo legezko tutoreak ezin duela programaren kostua ordaindu, Udalak hartuko du bere gain kostu hori.
