Martxan da berriz ere Pasaiako jabetze-eskola
Pasaiako Berdintasun Mahaiak eskaintza oparoa eskainiko du zazpigarren urtez, Pasaiako emakumeen antolatze eta saretze prozesuan urrats gehiago emateko. Hilaren 25era arte izango da izena emateko epea.
Egitarau oparoa antolatu du Pasaiako Berdintasun Mahaiak. Hasi berri da 2019-2020 ikasturtea, eta Pasaiako jabetze-eskolak ere kurtsoa abiatuko du. Pasaiako Berdintasun Mahaiko kideek (Harremantxo, Bekoz Beko, Azkuene, Topaketa, Lagun Artea, Pasaiako Udalaren Berdintasun Arloa eta emakume pasaitarrak) bultzatuta, jabetze-eskola hausnarketarako, sendotasunerako eta topaketarako gunea izaten jarraituko du.
Mahaiko kideen arabera, xedea emakume pasaitarren saretze eta ahalduntze prozesua indartzea da, betiere, helburu hauek aintzat hartuta: emakumeen eta emakume taldeen autonomia indartzea, sormenezko lana ezagutzera ematea eta emakumeek gizartean eta politikan parte har dezaten suspertze lanak egitea eta emakumeen artean trukean oinarritutako sareak sortzea eta bultzatzea.
Ikastaro, tailer eta ekintzez jositako urtea dator, eta gaien aniztasuna aipagarria da. Sei ikastaro egingo dituzte, besteak beste: Pepa Bojoren Asertibitatetik komunikatzen ikasten eta Nire zentroa berreskuratzen: gorputza lantzeko proposamena, Tatiana Arzelus eta Nekane Tomasenek gidatutako Elikadura eta osasuna, elkartzeko eta ikasteko gunea, edota Autoezagutza heldutasunean ikastaroan Clara Wolframekin.
Tailerrek ere garrantzia handia izango dute. Kontxi Lopez, Clara Wolfram eta Betania Mendoza izango dira formatzaileak, eta Logela propioa, Ezkutuko curriculumak edo Emakumeen ahotsa uhinetan zuzenduko dituzten tailerren bi adibide dira.
Pasaiako elkarteek ere badute zer esana ahalduntzeari dagokionez, hori dela eta urtean zehar haiek gidatutako ikastaro eta tailerrak ere antolatuko dira jabetze-eskolan. Berdintasunean oinarritutako herri bat izan dadin, Pasaiako Berdintasun Mahaiak, Pasaiako Udalaren Berdintasun Arloak eta Udalak oro har, pasaitar emakumeei dei egiten die, aurten ere ahalduntze-eskolarekin bat egin dezaten.
HAZ bulegoetan izena emateko aukera izango da, hilaren 25era arte. Nahi duenak bestalde, izena emateko inprimakia Pasaiako Udalaren webgunean izango du eskuragarri, ikastaroen informazio (datak, ordutegiak, tokiak…) guztiarekin batera.
