'Euskararekin match!' egiteko gonbita luzatu die euskaltegiak herritarrei
Udal Euskaltegian izena emateko epea, hilaren 25era arte zabalik jarraituko du. Ohiko ikastaroez gain, ikasleen maila eta beharrei egokitutako programa bereziak antolatuko dituzte.
'Euskararekin match!' lelopean hasiko du Ikasturte berria Udal Euskaltegiak Dena prest dute Pasaiako Udal Euskaltegian, 2019-2020 ikasturteari ekiteko. Euskarekin match! lelopean, euskararekin bat egiteko gonbita egin diete herritarrei, denek izan dezaten euskaraz bizitzeko aukera. Aurten ere, euskaltegiaren helburu nagusia hizkuntza integraziorako bidea izateko beharrezko baliabideak ematea izango da. Matrikulazio kanpaina zabalik izango da hilaren 25era arte.
Aurreko astean Antxon egindako agerraldian adierazi bezala, eskaintza zabala izango dute aurten, euskara nahieran ikasteko, aurrez-aurre ala on-line. Herritarren beharretara egokitzeko asmoz, ordutegi zabala izango du euskaltegiak, izan ere, 7:00etatik 21:00etara zabalik izango ditu ateak, astelehenetik ostiralera.
Beti bezala, bi orduko moduluei eutsiko diote, baina beste hainbat ikastaro antolatuko dituzte: euskara azkarrago ikasteko langabetuentzako astean 20 orduko ikastaro trinkoa, merkatarientzako ikastaroak, Pasaiara etorri berriak direnentzat, mintzamena landu nahi dutenentzat eta familiak modu ludikoan euskara ikasteko saioak egingo dituzte.
16 urtetik gorakoek eman dezakete izena Pasaiako Udal Euskaltegian eta profil guztiak ongi etorriak izango dira: kanpotarrak, erretirodunak, merkatariak, gurasoak edota agiri ofizialak lortu behar dituzten pertsonak.
Era berean, egoera ekonomikoa euskara ikasteko oztopoa izan ez dadin, neurriak hartu dituzte. Pasaiako Udalak diru laguntzak eskainiko dizkie euskaltegietako ikasleei, betiere, agindutako eskola-ordu kopurua betetzen badituzte. Diru-sarreren Bermatzeko Errenta zein Giza Larrialdietako Laguntza jasotzen dutenek eta langabetuek bestalde, matrikularen %20a ordaindu beharko dute besterik ez. Gainera, asistentziaren baldintza betetzen badute, Udalak kopuru hori ere itzuliko die. Langabetuen ikastaro trinkoak bestalde, doakoak izaten jarraituko dute.
Iazko arrakasta errepikatu nahi dute aurten euskaltegian. 281 ikaslek eman zuten izena, eta orotara 23 talde sortu zituzten. Gainera, azterketa ofizialetara aurkeztutakoen %75ek nahi zuten agiria lortu zuten. Izena eman nahi dutenek, ala besterik gabe, informazio gehiago jaso nahi dutenek, euskaltegira (Euskadi etorbidea 61, Trintxerpe) joan daitezke zuzenean edota 943 00 43 40 telefono zenbakira deitu.
