Hibaika animatzera joateko autobusak antolatu dituzte
Hibaika Arraun Elkartearen emakumeen ontziak hurrengo urtean Euskotren Ligan aritzeko kanporaketa izango du jokoan asteburuan.
Hibaikak oso lan txukuna egin zuen Kontxan. Argazkia: Irutxuloko HItza.
San Pedrok egin bezala, Hibaikak ere Madalen ontzia Bermeon eta Portugaleten babesteko autobusak antolatu ditu. Horietan izena emateko zerrenda Rosmi dendan dago. Hibaikak Euskotren Ligan aritzeko play offa izango du jokoan bihar eta etzi Bermeon (18:00) eta Portugaleten (12:00) hurrenez hurren. Hondarribia eta Zumaia izango ditu kontrario, plaza bakarrerako.
Bihar Bermeora joateko autobusa 14:00etan abiatuko da Zumardiko zubitik. Etzi, berriz, 08:00etan aterako dira toki berberetik zaleak Portugalete aldera. Autobusen prezioa, egun bakoitzeko: Hibaikaren bazkideek 1o euro, bazkide ez direnek 12.
Kontxako azken emaitzak ikusita, plaza Hondarribiaren eta Hibaikaren artean izango dela dirudi; noski, Zumaia ezin gutxietsi. Horrela, hondarribiarrak eta errenteriarrak eremu berberean eta elkarrekin neurtu diren azken aldia Kontxako lehen igandean izan zen: orduko hartan Hibaikak 9 segundoko tartearekin utzi zuen atzean Hondarribia.
Joan den igandean, Kontxako bigarrenean, kontsolazio txandan abiatu zen Hondarribiak, ohorezkoan izan zen Hibaikari 11 segundoko errenta atera zion. Ondorioa? Dena erabakitzeko dagoela, eta ez dagoela plaza eskuratzeko faborito argirik. Bermeon eta Portugaleten hitz egin beharko dute bi traineruek, aurretik egindako guztiek ez baitute deustarako balioko.
