[Galeria] Haurrak, azkar-azkar santakrutzetako krosean
Korrikalari talde bat, pozik, lasterketa ostean. Argazkia: Ana Mayoral. Atzo, Santakrutz Jaien txupinazoaren aurretik, herriko nahiz kanpoko haurrek jada klasiko bihurtzen ari den haurren krosean parte hartu zuten. Gurasoak, edo adinekoak jada txupinazo aurreko tragoskan pentsatzen ari ziren bitartean, haurrek izerditzeari ekiteko hautua egin zuten. Bakoitzak bere erara, batzuk azkar-azkar, besteak patxadaz, egin zuten Euskal Herria plazaren inguruan atondutako zirkuitua; txikienek motzagoa, koskorrenek luzeagoa.
Krosaren antolatzaileak pozik agertu dira, bai parte hartzearekin (2-12 adin tarteko 65 bat partaide), zein izan zen giroarekin; eta azken horretan, giroan, jarri dute indar gehien, izan ere, euren asmoa kirola egiten herriko giroari ekarpena egitea baitzen, lehiakortasunetik harago, partaidetza eta herri giroa sustatzea. Gainera, denek askari goxoa jaso zuten. Bejondeiela!
Ondokoak, antolatzaileek HITZAri helarazitako hainbat argazki dira, Ana Mayoralek ateratakoak. Eskerrik asko antolakuntza taldeari.
