Maila galduta ere, zaleak alboan izan dituzte
Sanpedrotarra Arraun Elkarteak maila galdu du eta ez dira TKE ligan arituko hurrengo urtean. Zaleek baina, ongi etorri paregabea egin zioten taldeari, San Pedrora iristean.
Maila galdu arren, ongi etorri paregabea izan zuten arraunalriek San Pedron. Argazkia: Sanpedrotarra A.E. Ez da posible izan. Playoffeko bi estropadetan hustu dira moreak, baina ez da nahikoa izan. Ares eta Zarautzeko Enbata gehiago izan dira eta arraun elkarte horiek izango dira hurrengo sasoian onenekin lehiatuko direnak.
Egia esan, Playoff osoan zehar, San Pedro ez da gai izan zarauztarrak eta galiziarrak estutzeko. Larunbateko erlojupekoan, Bermeon, hasiera ona egin arren, bigarren luzetik aurrera moreek segundo gutxi batzuk galtzen hasi ziren. Baina segundo gutxi horiek, asko dira Playoff batean. 4. postuan bukatu zuten, Deusturen atzetik.
Larunbateko emaitzak asko zaildu zuen helburu nagusia. Baliteke nolabaiteko urduritasuna zabaldu izana arraunlarien artean, auskalo. Dena dela, Mikel Arostegiren mutilak ez zuten amorerik eman, eta Portugaleten borroka ematen jarraitu zuten. 5. postuan bukatu zuen Libiak, baina dena eman zuten arraunlariek eta egindako ahalegina eskertu zuten zaleek txalo zaparrada baten bitartez.
Paregabea izan zen bertaratu ziren zaleen erantzuna, etsituta zeuden mutilei babesa adieraziz. Burumakur egin zuten alde Portugaletetik, baina tristura, harrotasun bihurtu zen San Pedrora iristean. Hamarka zale izan zituzten zain, pankarta eta guzti, sasoi osoan emandako borroka eskertzeko.
Ez da denboraldi normala izan eta zaleek badakite. Zailtasun eta aldaketa askorekin hasi zuten sasoia. Estropadetan dena eman dute moreek eta zaleek ez zuten gehiago eskatzen. Mikel Arostegik jarraituko du. Orain arte bezala lan egiten jarraitzen badute eta San Pedrok bloke sendo eta iraunkor bat eratzea lortzen badute, taldea haziko da berriz ere.
Herri arraunlaria da Pasaia eta bere arraun elkarteak, historikoak, baina datu esanguratsu bat utzi du Playoffak. Pasaiak ez du ordezkaritzarik izango TKE ligan lehen aldiz.
