Merituzko garaipena eskuratu zuen Pasaiak Realaren aurka
2-1 hartu zuen mendean Pasaia Kirol Elkarteak Reala C. Gernikaren aurka galdu eta gero, garaipen berri bat lortu zuten pasaitarrek etxean, Jesus Mari Zamora futbol zelaian.
Denboraldiko bigarren garaipena eskuratu zuen Pasaiak Jesu Mari Zamoran. Larunbat goizean aritu ziren nor baino nor Pasaia Kirol Elkartea eta Realaren hirugarren taldea. Berdegunera irtetean, ezustekoa topatu zuten harmailetan jokalari pasaitarrek, izan ere, ohi baino zale gehiago bildu ziren Jesus Mari Zamoran, etxekoei babesa emateko asmoz.
Norgehiagoka garrantzitsua zen larunbatekoa, bi taldeek norabide positiboa hartu nahi zuten eta. Aurreko partida galdu ostean, sentsazio negatiboak uxatu nahi zituzten pasaitarrek beheko postuetatik urrun mantentzeko. Txuri-urdinek ordea, sasoiko lehen garaipena eskuratu beharra zuten, gora begiratzen hasteko. Hortaz, bi taldeak ezer ez oparitzeko asmoz ekin zioten lehiari.
11:30tan hasi zen jokoa. Talde bakoitzak bere joko estiloa egin zuen. Realak baloia alde batetik bestera mugitu zuen, Pasaiako defentsa lerroan zirrikitu baten bila. Pasaitarrak baina, ongi kokatuta zeuden, eta Realaren hutsegiteak ongi asko baliatu zituen kontraerasora joateko. 24. minutuan lortu zuen Pasaiak goizeko lehen tantoa. Realaren atezaina ez zen gai izan Rodriren jaurtiketa behar bezala gelditzeko. Baloiak ihes egin zion eta Aratz aurrelariak ez zuen barkatu.
Nahiko kontrolpean zuen partida Pasaiak, baina 38. minutuan hutsegite larri baten ondorioak pairatu zituen. Zorte txarreko jokaldian, Pasaiako defentsa batek eta atezainak elkarri jo zioten, baloia ordea Karrikabururen oinetara iritsi zen. Gol erraza izan zen.
Berdinketa ez zen nahikoa bi taldeentzat eta bigarren zatian garaipenaren bila atera ziren. Intentsitateak gora egin zuen eta bi atezainek geldituak egin zituzten, taldeen zorionerako. Lanaren bitartez, bigarren zatiko 35. minutuan eskuratu zuen Pasaiak saria. Korner jaurtiketa batean Bernalek burukada dotore batekin lortu zuen pasaitarren gola. Markagailua ez zen gehiago aldatu, hiru puntuak etxean geratu ziren.
Sasoiko bigarren garaipena da Pasaiarentzat. 7 puntu dituzte eta 5. postuan dira hirugarren mailako 4. multzoan. Sasoia hasi berri da eta urteak luze joko du. Baina larunbateko garaipenari esker, hurrengo norgehiagoka lasaitasunez prestatu ahalko dute pasaitarrek.
