Donibaneko Gaztelekuak lokal berritua du
Pasai Donibaneko Gaztelekua berritu dute eta atzo geroztik zabalik ditu ateak, Donibaneko nerabeen topagunea izaten jarraitzeko. Aurten ostegunetan ere joateko aukera izango da.
Merienda on bat eginez ospatu zuten lokal berriaren irekiera gazteek, hezitzaileekin batera. 2019-2020 ikasturtea abiatu dute Pasaiako Gaztelekuek. Donibanen berritasunak dituzte, izan ere, lokala berritu egin dute, gazteen beharrei egokitzeko asmoz. Lekua bera, betiko berdina da. Hau da, Pasai Donibaneko eskolan (J.J. Otaegi plaza, 3) jarraituko du Gaztelekuak.
Atzo izan zen irekiera, eta nola ez, merienda on bat eginez ospatu zuten. Lehen eguna izanagatik ere, giro polita eratu zen, zenbait gaztek ez baitzuten lokal berria dastatzeko aukera galdu. Mokadutxoak janda, espazioaz gozatzeari ekin zioten, izan futbolinean, jolasetan ala besterik gabe lagun artean hitz egiten. Ongi pasatzeko eta jolasean aritzeko lekua da, baina batez ere, nerabeen topagunea izango da, gazteek propio sentitu dezaketen espazioa.
Ordutegiari dagokionez, berritasunekin dator Donibaneko Gaztelekua, baita Antxo eta Trintxerpe-San Pedrokoak ere. Orain arte, bi egunez irekitzen ziren Gaztelekuak, ostiral eta larunbatetan, 17:00-21:00etara. Aurten ostegunetan ere zabalik izango dira, baina ordutegi laburragoarekin, 18:00etatik 20:00etara. 13 eta 17 urte bitarteko gazteei zuzendua dago eta bazkide izatea, guztiz doakoa da.
