Esmalteriako egoitza erabat berritu du Orereta Ikastolak
Orereta Ikastolak berritasunekin hasi du ikasturtea. Besteak beste, Haur Hezkuntzako Esmalteriako eraikin berrituarekin abiatu dute sasoia.
Esmalteriako egoitzako espazio berrietako bat. Argazkia: Orereta Ikastola. Orereta Ikastolak eta Oiartzo Batxilergo Eskolak hasi dute ikasturte berria, 1.500 ikasle pasatxorekin. Orereta Ikastolak badu berritasun nagusi bat: Esmalteriako Haur Hezkuntzako egoitza erabat berritu du udan, Esmalteria Berria eraikina jaio da. Ikastolatik jakinarazi dute hezkuntza egitasmoa integrala izan dadin espazioek ere horri erantzun behar diotela, “erronkari heldu zitzaion irakasle eta gurasoen artean orain ikasturte batzuk. Elkarlan horren fruitua da jaio berri den Esmalteria Berria”.
Ikastolan haurren behar, sen eta erritmoari begira lan egiten dutela nabarmendu dute Orereta Ikastolako kideek, “konfiantzaren eta integrazioaren pedagogia oinarri”, eta eraikin berritua horren adibide dela nabarmendu, “apustua egin eta aurrerapausoa eman duen herriko lehen ikastetxea da Orereta Ikastola”.
Etxeko otorduak
Bestalde, ikastolatik adierazi dute Añabitarteko eraikinean prestatuko dituztela aurten lehenengoz Añabitarte, Esmalteria zein Linoko egoitzetako jangeletan ematen dituzten otorduak, “etxeko otorduak izango dituzte lehenengoz jangelan gelditzen diren ikasle guztiek”. Janaria prestatu eta garraiatzeko inbertsioak egin dituztela esan dute ikastolatik, baita sukaldeko lantaldea indartu ere.
Gainera, ikastolaren eraikin guztietan desfibriladoreak jarriko dituztela zehaztu dute hezkuntza zentroko arduradunek. Lehen sorospenerako arreta eskola curriculumean erabat txertatzeko neurria da hori. Iaz, Ikastolako eta Oiartzoko langileek nahiz DBHko eta batxilergoko ikasleek gaiaz formazio saioak egin zituzten.
