Etxebizitza komunitarioan libre dauden logelak zozkatuko ditu udalak
Interesdunek urriaren 10era arte izango dute izena emateko aukera, eta horretarako Zu! Zure Udala Arreta Zerbitzura jo behar dute astelehen, asteazken eta ostiraletan 07:30etik 15:00etara, edo astearte eta ostegunetan 07.30etik 19:00etara.
Maite Gartzia zinegotzia, Bea Martin Gazteria dinamizatzailea eta egun etxebizitza komunitarioan bizi diren hiru gazte. Argazkia: Herri Bizia Gazteen etxebizitza komunitarioan libre dauden logelen errentamendu zozketan parte hartzeko epea zabaldu du udalak. Hala jakinarazi dute Maite Gartzia gazteria zinegotziak eta Bea Martin Gazteria dinamizatzaileak Etxebizitza komunitarioan bizi diren hiru gazterekin batera gaur egin duten agerraldian.
Interesdunek urriaren 10era arte izango dute izena emateko aukera, eta horretarako Zu! Zure Udala Arreta Zerbitzura jo behar dute astelehen, asteazken eta ostiraletan 07:30etik 15:00etara, edo astearte eta ostegunetan 07.30etik 19:00etara. Zozketan parte hartu ahalko dute Errenterian erroldatuta dauden (gutxienez aurreko sei hilabeteetan) 18 eta 30 urte arteko gazteek. Zerga eta betebeharretan egunean izan beharko dute, etxebizitza propiorik ezin dute izan, eta urtean 26.000 euroko ditu sarrera izan beharko dute gehienez.
Inprimakiak behar bezala beteta aurkeztu beharko dituzte epearen barruan, agiri osagarriekin batera (nortasun agiria edota ordezkatzen duen dokumentuaren kopia). Informazio gehiago eskuratzeko, gazteriaren posta elektronikora mezua bidal dezakete, gazteriaren webgunean kontsultatu, 943 449 600 edo 943 449 606 telefono zenbakietara deitu, Zu! zure udala zerbitzuan, edota Merkatuzarreko hezkuntza eta gazteria bulegoan galdetu.
Gartziak gogora ekarri du udalaren Gazteria azpisailak Marea Gora prozesua abiatu zuela, besteak beste, gazteen iritzia ezagutu asmoz, “emantzipatzeko zailtasuna izan zen kezka nabarmena. Emantzipazioaren ardatz nagusiak, etxebizitza izatea eta lana lortzea dira”. Etxebizitzari dagokionez, gazte askok zailtasunak dituztela gurasoen etxea utzi eta beren proiektua era autonomoan eraikitzeko orduan nabarmendu du Gazteria zinegotziak, “besteak beste, errentamenduen prezioak merkatu librean ez datozelako bat gazte , eta ez hain gazte, askoren gaitasun ekonomikoarekin”.
Etxebizitza komunitarioak errentamendua erraztu nahi die beharra duten gazte horiei, baina ez hori bakarrik: “Errentamendu eredu ezberdin bat sustatu nahi du udalak, komunitatean oinarritua, eta epe luzera jende askoren egoera hobetzeko nahia duena”
