Gogoz hasi du sasoia Allerruk
Allerruk aspaldiko talde kopuru handiena izango du aurtengo futbol sasoian. Taldeak jada hasi dira lehenengo garaipenak lortzen.
Erregional Preferenteko taldeak erraz irabazi ditu lehen bi partidak. 2019-2020 sasoiari gogor ekin dio Allerruk. Asteburuko emaitzak horren seinale. Adibidez, Erregional Preferenteko taldeak 1-6 irabazi zuen Gure Txokoaren zelaian asteburuan, ligako bigarren jardunaldian; lehenean, 7-0 jipoitu zuten Roteta Plazetan: bi partida irabazita, lider dira lezoarrak aldeko 13 gol eta kontrako bakarrarekin. Hori bakarrik ez: emakumeen Gorengo Mailako taldeak Trintxerperi 4-0 irabazten hasi du liga. Beraz, kirol elkartearen talde nagusiek ederki asko egion diote sasoiari.
Allerruko nesken taldea.
Asteburuko beste emaitzetan, gizonen Lehen Erregionaleko taldeak (aurten berriz ere itzuli da) 2-5 galdu zuen Orereta Kafearen kontra; eta gizonen Gazteen Lehen Mailako bi taldeek, batel irabazi (A taldeak, 3-1 Trintxerperi) eta besteak galdu (B taldeak, 5-0 Orereta Kafearen kontra). Nesken Kadete taldeak, besteak, bana egin zuen Santo Tomas Lizeoaren kontra.
Taldeen kopurua, gora
Asteburuko emaitzetaz aparte, Allerru Kirol Elkartea sasoiko dago, osasun onarekin. Izan ere, aurten, orotara 14 talde osatzea lortu dute lezoarrek, iazkoak baino bi gehiago: gizonen Lehen Erregional Mailakoa, eta nesken Haur Mailakoa dira bi talde berriak.
Beraz, honakoak dira Allerruren taldeak:
- Emakumeen Gorengo Mailako taldea.
- Gizonen Erregional Preferenteko taldea.
- Gizonen Lehen Erregionaleko taldea.
- Mutilen Gazte Mailako A eta B taldeak (Gipuzkoako Lehen Mailan daude biak).
- Nesken Kadete Mailako taldea.
- Nesken Haur Mailako taldea.
- Mutilen Haur Mailako A eta B taldeak.
- Eskolako bost talde, mistoak, 2008 eta 2011 urteen arteko partaideekin.
