Abaraxkaren martxa urriarekin batera hasiko da
Urriaren 1ean hasiko da ikasturtea, eta ospatzeko festa larunbat arratsaldean egingo dute. Ludotekako gurasoentzat eta familia eremukoentzako bilera bana egingo dituzte.
Abaraxka 2019-2020 ikasturterako prest da. Ikasturtea hasi berri da, eta eragile gutxi geratuko dira oraindik 2019-2020 hau hasi ez dutenak. Tartean da Abaraxka ludoteka. Ikasturtea urriarekin batera hasiko dute, datorren asteartean. Kurtso hasieraren festa, baina, larunbatean izango da, 17:00etatik aurrera.
Ikasturte honetan ordutegi bera izango du ludotekak: 16:30etik 19:30era. Astelehenetan familientzako eremua eskainiko dute —0 eta 6 urte arteko haurrei zuzendutakoa—, eta asteartetik ostiralera bitartean ludoteka (6-12 urte artekoentzako). Larunbatetan Ludoteka Ibiltaria egingo dute, eta adina jardueraren arabera ezarriko da.
Kafe bilerak eta ate irekiak
Gurasoentzako beste bi hitzordu jarri dituzte, kafe bilera formatukoak. Alde batetik, ludotekako haurren gurasoentzako. Urriaren 2an elkartuko dira, 15:30ean. Bestetik, familia eremuko gurasoentzako. Urriaren 7an elkartuko dira, ordu berean. Biak ala biak ludotekan izango dira.
Gainera, ate irekiak egingo dituzte lehen egunetan. Ludotekaren kasuan, urriaren 1etik 11ra izango dira. Familia eremuaren funtzionamendua ezagutzeko, urriko astelehen guztietan egin daiteke.
Izen ematea ikasturte osoan egin daiteke, baina Abaraxkako arduradunek gomendatu dute ate irekien epean egitea.
