2020ko zergak eta tasak onartu ditu udalbatzarrak
KPIaren araberako igoera izango dute udaleko zergek, aho batez adostuta. San Markoseko 2017ko aurrekontuak, behin betiko baliogabetuak.
Irailari dagokion ohikoa plenoa izan zen atzokoa.
Ikasturteko lehenengo ohiko plenoa egin zuten atzo arratsean. Puntu garrantzitsuena, oiartzuar gehienei eragingo diena, 2020ko zerga eta tasen ordenantza onartu zuten, aho batez. KPIaren arabera igoko dira zerga eta tasa gehienak.
Hainbat tasa mantenduko dira, baina beste batzuek izango dute gorabeherarik. Udal kirol instalazioen erabilera %2 igoko da. Jaitsiko dena, berriz, etxez etxeko zerbitzuarena izango da, aldundiaren lortutako hitzarmenari esker.
EAJk aldeko botoari ñabardura bat egin nahi izan zion Rafael Bergaretxe jeltzaleen bozeramaileak. Egoki deritzote KPIaren igoera aplikatzeari, baina hondakinen tasan sarreren eta irteeren artean dagoen aldea —negatiboa— zaintzeko eskatu zioten udal gobernu taldeari.
Jexux Leonet alkateak erantzun zion aztertuko dutela dagokion testuinguruan. Izan ere, kirol instalazioak ere defizitarioak direla aipatu zuen. Horrez gain, zehaztu zuen Gipuzkoan hondakinak tratatzeko hondakinen eraikitzeak zein eragin ekonomiko izango duen ikusi behar den.
San Markorekin, bi gai
San Marko Mankomunitatearekin lotutako bi gairen berri eman zuten ondoren, bozketarik gabe. Mankomunitatearen 2017ko aurrekontuak baliogabetu zituen EAEko Auzitegi Nagusiak, eta erabaki horri kasazio helegitea jarri zioten. Hala ere, auzitegiak ez du onartu, eta behin betiko baliogabetuta geratu dira.
Garbiguneengatik egindako ekarpen ekonomikoa berkalkulatu eta dirua jaso beharko du Oiartzunek, Usurbil, Donostia eta Hernanik. Izan ere, udalerri bakoitzak ordaindu behar zuen bere garbigunea. Orain, denen artean egingo dute.
Beste puntuan, udalak mankomunitateari bi eskaera egin dizkiola azaldu zuten. Alde batetik, auditoria egitea, hamarkada luze pasa baita azkeneko aldiz egin zenetik eta gauzak asko aldatu direla uste baitute.
Bestetik, likidazioa erreferentziatzat hartuta, udalek zenbat jaso eta zenbat eman behar duten kalkulatzea eskatu dute. Bi eskaerei uko egin die San Markok.
Puntu bat gehiago
Plenoak, hasiera batean, zortzi puntu zituen, baina beste bat erantsi zioten, urgentziaz. Udalak eta Agintzari elkarteak hitzarmena sinatzea adostu zuten, hori ere bai, aho batez. Diru laguntza eta udaletxean lanpostu baterako tokia jasoko du elkarteak, adin txikikoekin lanean jarraitzeko.
Eskari eta galderetan, berriz, EAJk Elorsoro kiroldegia izan zuen hizpide. Erabiltzaile batzuek hainbat kexa helarazi dizkiete: hainbat gauza utzita daudela, kexen kutxarik jada ez dagoela, paddle pista ezin dela erabili… Begi bat jartzeko eskatu zioten udal gobernu taldeari.
Leonetek erantzun zion enkargua jasoko zutela, eta helburua dela kirol instalazioa eguneratuta edukitzea.
