Musika bandak emanaldia egingo du Aian
Ez da nolanahikoa izango, Herriz herri musikaz historian zehar emanaldirako argazkiak eta musika uztartuko ditu, eta ahotsa jarri Aitor Albistur bertsolariarekin eta Iker Casares tenorearekin.
Aierdi, Arrizabalaga, Mitxelena, Albistur eta Erkizia. EMKEren Musika Bandak emanaldia egingo du urriaren 5ean (larunbata) Aian. Ez da nolanahikoa izango, Herriz herri musikaz historian zehar emanaldirako argazkiak eta musika uztartuko ditu, eta ahotsa jarri Aitor Albistur bertsolariarekin eta Iker Casares tenorearekin. Gaur aurkeztu dute proiektua Errenteriako Udalean Josu Mitxelena bandaren presidenteak, Alain Aierdi zuzendariak, Iñaki Erkizia argazkilariak, Aitor Albistur bertsolariak eta Nekane Arrizabalaga Aiako alkateak.
Ideia nola sortu zen eta kontzertua nola mamitu den azaldu du Mitxelenak: “Proiektuaren bidez Gipuzkoako herri txikietan musika emanaldiak egin nahi ditugu, musika banda ez duten herri txikietara eraman gurea eta musika eta herri horien historia uztartuko lukeen kontzertu ibiltaria egin, musika bidaia proposatuz”. Kutxa Fundazioari iniziatiba aurkeztu eta begi onez ikusi zuela azaldu du, “aurrera egin genuen, beraz”. Eta Aia aukeratu zuten lehen musika bidaia egiteko. Hurbilean eragin nahi du bandak, baina baita musika kultura zabaldu hurbileko eremu horretatik harago.
Argazki bila abiatu ziren orduan eta hasieran ez zutela askorik topatu azaldu du Erkiziak, “udal artxibora deitu genuen ondoren eta argazki mordoa topatu dugu bertan, izugarri pila. Horiekin batera, 1963an Sueziak egindako Basker dokumentaletik ere lortu ditugu Aiako irudiak, baita Gure Gipuzkoa webgunetik eta Aldalur familiak utzitakok ere”· 300 argazki dira guztira; herri kirola, paisaia, traineruak, ezkontzak, eta Aiako herritarren argazkiak bildu dituzte.
Arrizabalaga pozik daudela esan du emanaldiarekin da eta esker ona azaldu dio EMKE Bandari, “Aia aukeratzeagatik emanaldirako. Proiektua aurkeztu zigutenean sentsazio ona izan genuen hasieratik. Ez da gainera ohikoa musika banda bat plazan izatea, eta oso polita izango da kontuan hartuta bertsolaritza ere uztartu dutela proiektuaren barruan”. Publikoz abalak gozatzeko moduko eskaintza izango dela gaineratu du Arrizabalagak, eta Errenteriakoa, sona handiko banda dela gaineratu du.
Aierdik kontzertuaren gaineko zehaztasunak eman ditu. Hiru zati izango ditu kontzertuak, eta euskal musika joko dute. Lehenengo zatian musika banda arituko da soilik; bigarren zatian Aitor Albistur bertsolariak hartuko du lekukoa eta bandak akonpainamendua egingo dio; eta hirugarren zatian, Iker Casares tenoreak abestuko du. Emanaldia bitartean argazkiek osatuko dute bidaia.
Gozategi plazan izango da emanaldia 20:30ean, eta emanaldirako propio dotore antolatuko dutela jakinarazi dute, musika bandaren atzealdean pantaila erraldoia kokatuta. Eguraldiak laguntzen ez badu probalekura eramango dute emanaldia.
Autobusa Aiara
Aiarrek fin erantzungo diote hitzorduari, baina hala ere musika bandak autobusa antolatu du Errenteriatik bertaratu nahi duten bazkide eta jarraitzaileentzat. Doan izango da eta interesdunek Bitxi Kolore saltokian eman behar dute izena (Madalena kalea 2). 18:00etan irtengo da autobusa Errenteriatik, eta zehaztasun guztiak izena emateko garaian jasoko dituzte saltokian bertan.
