Bertsozaleek Elizalden izango dute urteroko "kategoriko" zita
Urriaren 12an bertso bazkaria egingo dute herri eskolan. Andoni Egaña, Maddalen Arzallus, Maialen Lujanbio eta Ander Lizarralderekin.
Jende dezente erakartzen du bertso bazkariak.
Elizalde Herri Eskolak beste urte batez —eta seigarrena izango da— kategoriko bertso bazkaria antolatu du. Urriaren 12an izango da aurtengoa, eta maila altuko lau bertsolari gonbidatu dituzte Beheko Plazako ikastetxera.
Andoni Egaña, Maialen Lujanbio, Ander Lizarralde eta Maddalen Arzallus bertsolariak ariko dira, 14:00etatik aurrera. Aurten aldaketa egongo da laukoan: Maialen Lujanbio Alaia Martinengatik arituko da, eta Arzallusek bere anaia Amets ordeztuko du.
Bertan goxo bazkaldu eta bertsoak entzun nahi dituenak honako tokietan erosi beharko ditu txartelak: eskolan bertan, Elorsoro kiroldegian, eta Kabitxo eta Kastro tabernetan.
Helduentzako prezioa hogei eurokoa izango da, gazteentzakoa hamabikoa eta haurrek sei euro ordaindu beharko dituzte.
Elizalde Herri Eskolak antolatzen du bazkaria, eta Oiartzungo Udalaren zein Oiartzungo Bertso Eskolaren laguntza jasotzen dute.
