Kortak arrosa izaten jarraituko du hurrengo denboraldian
Jose Luis Korta San Juan-Koxtape Arraun Elkarteko entrenatzailea izango da 2020. urtean.
Jose Luis Korta (Ortzaika, Orio 1949) eta San Juan-Koxtapek egungo harremana luzatu egingo dute. Pasai Donibaneko arraun elkarteak atzo baieztatu zuen albistea, sare sozialen bidez. Oriokoak sasoi oso bat izango du, taldea nahieran antolatzeko eta bere lan ildoak ezartzeko. Helburua, bloke indartsua sortzea izango da, eta ahal den neurrian, TKE ligara itzultzeko lehian egotea.
Bi hilabete eskas eman ditu Kortak arrosen entrenatzaile gisa, uztailean hartu baitzuen Juan Mari Etxaberen lekukoa. Ustekabeko albistea izan zen, eta ilusioa piztu egin zuen zale askoren artean. Baina denbora gutxi izan du taldera moldatzeko eta bere lan eredua ezartzeko.
Pasa berri den sasoia, nahiko irregularra izan da Donibaneko mutilentzat. Dena dela, Korta iritsi ahala, taldeak hobera egin zuen hainbat unetan. Eta azken estropadan iritsi zen zaleentzako oparia, Bilboko bandera. Garaipen eta hobekuntza horiei eutsi egingo dio San Juanek 2020. urtean.