Frankismoak zapaldutakoei omenaldia egingo die Etxetxok hilaren 19an
Etxetxo baserriko familiaren omenez monolitoa inauguratuko dute Mattejoane eta Miura baserrien artean. Hilaren 12an, beste auzolan bat.
Frankismoaren esklaboak, Jaizkibelen lanean. Etxetxo Lezoko Memoria Historikoaren Taldeak frankismoaren biktimei, errepresaliatuei eta esklaboei aitortza egiteko omenaldi eguna antolatu du hilaren 19rako (larunbata da). Aurten dira 80 urte frankismoaren lehen esklaboak Lezora ekarri zituztela, eta horren harira, urtarriletik hainbat ekintza eta ekitaldi ari dira egiten herrian.
Hilaren 19ko egitarauari dagokionez, 11:00etan Lezoko memoriaren ibilbide gidatua egingo dute, Gurutze Santuaren plazatik abiatuta. 12:00etan, berriz, 1936ko uztailaren 27an eraildako Etxetxo baserriko familiaren omenez monolitoa inauguratuko dute. Mattejoane eta Miura baserrien artean jarriko dute oroigarria. 13:00etan, omenaldi ekitaldi nagusia egingo dute herriko plazan.
Hemen klikatuz gero, 2006ko irailean ON aldizkariak (OARSOALDEKO HITZAren hilabetekari izan zen) Etxetxo baserriko gertaeren gainean egindako erreportajea ikus daiteke.
Beste esteka honetan, berriz, Etxetxoko kideek gertakari haien kontaketa egin zutenekoa, HITZAk argitaratutako iritzi artikuluan.
Hilaren 12an, auzolana
Iparragirre aldeko eremua garbitzeko auzolanarekin jarraituko du, hilaren 12an, Etxetxok. 09:30ean abiatuko dira Tiñelu ondotik harantz joateko. Etxetxok iragarri du gosaria euren esku izango dela. Auzolanarekin bat eging0 dutenei eskatu diete lanerako eskularruak eta arropa aproposa eraman dezatela.
