Kezka azaldu du EH Bilduk euskararen kale erabileraren datuekin
Egoera iraultzeko urratsak egin beharra nabarmendu du. Herritar bakoitzak egin dezakeenaz harago, udalak eredu izan behar duela dio EH Bilduk, "goitik behera euskaraz funtzionatuz".
Mikel arruti EH Bilduren bozeramailea gainontzeko zerrenda kideekin hautagaitza aurkezteko ekitaldian. Euskararen kale erabilerak ia lau puntuan egin du behera Lezoko kaleetan. Hala jaso du Soziolinguistika Klusterrak urtarrila eta otsaila artean udalerriko kaleetan egindako ikerketan. Horren aurrean kezka azaldu du EH Bilduk: “Euskararen errealitatea ezagutzeko funtsezkoa da kalean zenbat euskara erabiltzen den jakitea. Lezoko kale erabileraren neurketaren emaitzak ezagutu berri ditugu, eta ez dira batere positiboak”.
2.000 urtetik jasotako erabilera daturik baxuenak izan direla aurtengoak nabarmendu du koalizio subiranistak, “azken lau urteotan, ia lau puntu jaitsi da kale erabilera”.
Kezka larritasun ere bihurtu da EH Bildurentzat, “hizkuntza baten egoeraren adierazle nabarmenena eta fidagarriena erabilera dela kontuan hartuta, euskararen egoerak okerrera egin du gure herrian”. Ikerketak emandako datuak hainbat aldagairen emaitza direla esan du, eta nabarmendu egin du euskaldunek urte luzeetan jasan duten “bazterkeria” eta hizkuntza eskubideen urraketa, “gaur egun, oraindik ere, euskaraz bizitzeko eskubidea, bistan denez ez dugu bermatua”.
Egoera iraultzeko urratsak egin beharra nabarmendu du koalizioak: “Hizkuntzaren erabilera Lezotik harago ere jokatzen dela ohartzen gara, eta horren harira, hizkuntza normalizazio prozesuaren pisu nagusia norbanakoen bizkar jartzen duen gaur egungo hizkuntza politika gainditzeko urrats esanguratsuak egin beharra aldarrikatzen dugu”.
Lezoarrek ere badutela zeregina erantsi du, eta beraiei ere badagokiela euskararen normalizaziorako urratsak egitea. Herritar bakoitzak egin dezakeenaz harago, udalak eredu izan behar duela dio EH Bilduk, “goitik behera euskaraz funtzionatuz”. Neurri zehatzak hartzeko garaia aspaldi heldu zen bere ustez: “Azken urteetako lasaikeria albo batera utzi eta udal ordezkariak deitzen ditugu urte luzez elkartu gabe egon den Euskara Batzordea berrosatzera: egoeraren inguruko irakurketa egiteko, batetik; eta euskararen normalizazioaren aldeko ekinbide zehatzak eta formula berriak proposatzeko, bestetik”.
Batzordean parte hartzeko konpromisoa hartu du EH Bilduk baita lanketa propioa egiteko ere.
