Arkitekturaren Mundu Egunarekin bat eginez, Pasaia bisitatu du arkitektoen elkargoak
Ondartxon, Trintxerpe eta Herrera arteko ibilbidean, eta Ospitalilloaren inguruetan murgildu da ordezkaritza, Izaskun Gomez alkateak eta Rafaela Romero foru diputatuak lagunduta.
Rafaela Romera, Izaskun Gomez eta arkitektoen elkargoko ordezkariak, Pasaian 2019. urteko Arkitekturaren Mundu Egunaren harira, Euskal Herriko Arkitektoen Elkargoko Gipuzkoako ordezkaritzak Pasaia bisitatu du gaur goizean. Biziberritze planaren gune garrantzitsuenetara jo du ordezkaritzak, Rafaela Moreno Mugikortasun eta Lurralde Antolamendu Departamentuko foru diputatuak eta Izaskun Gomez Pasaiako alkateak lagunduta. Ondartxo pasealekuan, Trintxerpe eta Herrerako geltokia lotzen dituen bidegorrian zein oinezkoentzako bidean, eta Ospitalilloaren inguruetan barrena murgildu dira bisitariak.
Biziberritze planaren ondorioz, hirigintza arloan emango diren aldaketez gain, berrindartze ekonomikoa ere ekarriko duela sinetsita daude hautetsiak. Espazio berrietan lanpostu berriak sortuko direla ziur agertu dira, eta hirugarren sektorearekin lotutako enplegua izango dela esan dute.
Ildo horretan, bizi-kalitatea hobetuko dela uste dute planaren bultzatzaileak, eta Pasaiarentzako «eraldaketa historiko bat bertatik bertara bizitzen» ari direla nabarmendu dute. Prozesu honen bukaeran, Pasaia, «Gipuzkoako gune degradatuetako bat» izateari utziko diola ziur agertu dira.
