Antxoko tren geltoki berriaren proiektua babesteko sinadurak biltzen ari dira
Antxoko Geltoki Berriaren Plataformaren proposamenak, herriak espazioa eta bizi kalitatea irabaztea du helburu. Hilaren 20ra arte jasoko dituzte sinadurak.
Antxoko tren geltokia, gaur egun. Adifek Antxoko tren geltokia birmoldatuko zuela jakinarazi zuen unetik, zenbait herritar antolatzen hasi ziren, bertan egindakoa, antxotarren bizitza kalitatearen onerako izan zedin. Antxoko Geltoki Berriaren Plataformak trenbidearen eremua optimizatu nahi du, herriak iparraldean espazioa irabaz dezan.
Geltoki berriaren inguruko proposamena, herritarren parte hartzearen ondorio izatea nahi dute, eta helburu horri jarraiki, sinadura bilketa abiarazi dute. Sinadurak biltzeko paperak, Antxoko zenbait komertziotan daude eskuragarri, hala nola, liburu dendetan, okindegietan edota farmazietan. Interesdunek proposamenari buruzko informazioa topatuko dute paperari atxikita.
Ildo beretik, plataformako kideak hurrengo bi larunbatetan, hilaren 12 eta 13an, informazio postua jarriko dute Gure Zumardian goizean zehar, nahi duenari azalpenak emateko. Dagoeneko ehunka pertsonek bat egin dute plataformarekin, “700 lagun baino gehiagok sinatu dute orain arte. Pozik gaude, baina jende gehiagok parte hartzea nahiko genuke”, adierazi du Eduardo Perez, Antxoko Geltoki Berriaren Plataformako sortzaileak. Perezek eman zuen proiektuaren berri, gutun ireki baten bidez eta ziur da, geltokiak utzitako espazioa Antxon bizitza kalitatea hobetzeko mugarria izan daitekeela.
Sinadurak eta bestelako dokumentuak, hilaren 20ra arte bilduko dituzte, 21ean Pasaiako Udalera eramango dituzte eta. Herritarren nahia, mozio baten bidez aintzat hartzea nahi dute plataformako sustatzaileek, “hilaren 29an egingo den ohiko udalbatzarrean, gaia aztertua izatea nahi dugu”.
Plataformako kideek bilera informatiboa antolatu zuten irailaren 14an eta bertan zehaztu zituzten plataformaren lan ildoak. Herriaren orografia konplexuaz jakitun izanda, geltokiari kendutako eremua, arnasgune garrantzitsua izango litzateke kideen arabera.
