Garaikur sorta ekarri du Pasaia Kayakek Zaragozatik
Ion Carballok beste garaipen bat lortu zuen Zaragozan, lehia biziko proba batean. Jubenil kategorian, Irazuk ez zien aukerarik eman arerioei.
Pasaiako Kayakeko palistak Zaragozan, Ebro ibaia atzean dutela. Igandean jokatu zen Zaragoza Hiria piraguismo proba ospetsua, palistek gustura egiten duten horietakoa. Pasaia Kayakeko palistek ez zuten hutsik egin, eta ordezkaritza zabala eraman zuten trintxerpetarrek Aragoiko hiriburura.
Udako etenaldiaren ondorengo lehen proba izan zen parte hartzaile gehienentzat. Pasaitarrek, sasoi betean daudela frogatu zuten, hainbat garaipen lortu zituzten eta. Senior mailan, Ion Carballok gogotik egin behar izan zuen lana, urrezko domina Trintxerpera eramateko. Esprint luze eta gogor batean, Zaragozako Helios, Lugoko Fluvial eta Piraguisme Castelldefels taldeen palistak mendean hartu zituen, estu.
Aipamen berezia merezi dute, kategoria txikietako neskek, eskuratutako garaipenak direla eta, Ebroko uretan lortutako ia guztiak. Aiora Irazu nagusitasunez irabazle izan zen Zaragozako proban, eta bere burua testatzeko aukera bikaina izan zuen oiartzuarrak, hurrengo asteko Txinako ur lasaien maratoiari begira.
Laura Zunzunegi ere onena izan zen kadeteen artean eta Maddi Tarragonak erakustaldia eman zuen infantil A kategorian, lortuta, 200o metroko proban. Uxia Blancok bestalde bigarren postuan bukatu zuen infantil B kategoriako proban. Guztira, 4 garaipen eta zilarrezko postu bat podiumean Trintxerpeko taldearentzat.
