'Herri Txiki, infernu handi', Lezon
'Herri txiki, infernu handi' ETBko saioaren barruko grabazioak egiten ari dira gaur Lezon. Hilaren 17an beste bat egingo dute, denei irekia, Bekoerrotan.
Gaurko grabazioen une bat. Argazkia: 'Herri Txiki, Infernu Handi'. ETB1eko Herri txiki, infernu handi telesaileko kideak grabazioa egiten ari dira Lezon, gaur. Zuhaitz Gurrutxaga eta Mikel Pagadi aurkezleak zenbait herritarrekin ari dira grabazioak egiten, herriaren gaineko informazioa eta bitxikeriak jasotzeko. Saiotik adierazi dutenez, besteak beste, Mikel Susperregi, Enrike Arizaga, Juanito Elorza, Joakina Gaztelumendi edo Martxer Legorburu lezoarrekin egiten ari dira grabazio saioak.
Gaur jasotakoarekin, eta beste hainbat osagairekin, bigarren grabazioa egingo dute hilaren 17an (osteguna), 20:00etan, Bekoerrota kiroldegiko pilotalekuan. Horretara nahi duen oro joan daiteke, irekia da, eta doan.
Hilaren 17ko saio horretan, herritarrei egindako grabazioez gain, Gurrutxagak eta Pagadik bakarrizketak egingo dituzte. Sebastian Lizaso bertsolariak ere parte hartuko du. Egun horretako grabazioa izango da, hain zuzen, ETBn emango duten atalaren oinarria.
Gaurko grabazio baten une bat. Argazkia: ‘Herri txiki, infernu handi’.
Mikel Pagadi eta Zuhaitz Gurrutxaga, gaur, Goiko plazan. Argazkia: ‘Herri txiki, infernu handi’
