Jorge Oteizaren erakusketak azken txanpa hasi du
Eskultorearen lanari buruzko erakusketa amaitzear da. Igandera arte Oteiza hizpide izango duten hainbat jarduera antolatuko dituzte.
Erakusketa hilaren 13ra arte izango da ikusgai Victor Hugo Etxean. Argazkia: Oarsoaldea Turismoa Jorge Oteizaren lanari buruzko erakusketak uste baino harrera hobeagoa izan du eta bi hilabete eta erdiz mantendu da Donibaneko Victor Hugo Etxean. Baina amaiera gertu da, hilaren 13an (igandea) bukatuko da eta.
Orioko eskultoreari agur esan baino lehen, Oteiza hizpide izango duen egitaraua antolatu dute Pasaian. Gaur izango da Jorge Oteiza Marrazkiak, Estanpak Hitzak (eta Eskulturak) erakusketan bisita gidatua egiteko azken arratsaldea. 19:00tan lehen txanda egingo dute, gaztelaniaz, Felix Marañaren gidaritzapean. Hurrengo txanda, 20:00tan izango da eta Aitor Azurkik gidatuko du, euskaraz.
Bihar Oteiza Dardarka filma botako dute Pasai Donibanen. Erakusketa bezala, bi txandetan izango da filmaren emanaldia, bata 19:00tan gaztelaniaz, eta bestea 20:00tan euskaraz.
Hilaren 11an Trintxerpek hartuko Oteiza Dardarka filmaren proiekzioa, ordutegi berdinean. Felix Maraña, erakusketaren sortzailea eta Nuria Ruiz Cabestany bi emanaldietan izango dira.
12an (larunbata) azken bisita gidatua egingo dute, ezohiko ordutegian, 12:00etatik aurrera. Erakusketaren amaiera ekitaldia igandean burutuko dute, 12:00etan. Programa berezia iragarri dute antolatzaileek eta jakinarazi dutenez, hurrengo egunetan edukien berri emango dute.
