Aholkularitza juridikoa eta ahalduntze gunea zerbitzuak eskainiko ditu Emakumeen Etxeak
Indarkeria egoera bizi duten emakumeak izango dira bi zerbitzu horien hartzaileak, baina ez beraiek bakarrik, beren zaintza lanetan, edo horien ondoan diren beste emakume horiei begirakoak era badira bi aholkularitza zerbitzu horiek.
Emakumeen Etxeko talde eragilea atzoko agerraldian. Emakumeen Etxeak bederatzi hilabeteko bidea egin du, eta epe laburrekoa bada ere oraindik ibilbide hori, oparoa izaten ari den zalantzarik ez da. Elkargunea izan nahi zuen, topaleku, feminismoa eta balioetan hazteko eta hezteko espazioa, emakumeen behar ezberdinak asetzeko gunea, ahalduntzerako espazioa, baita babeserako eremua ere. Azken horrekin bereziki lotutako agerraldia egin zuen atzo Emakumeen Etxearen talde eragileak —emakume taldeek eta udalak elkarlanean kudeatzen dute etxea talde horretatik— izan ere, aholkularitza juridikoa eta ahalduntze gunea zerbitzuak eskainiko ditu.
Itziar Ostolaza Berdintasun azpisaileko zinegotziak eman zituen zerbitzu horien gaineko zehaztasunak, Emakumeen Etxearen egikaritze prozesuan bi arlo horiek oso garrantzitsuak izan direla nabarmenduta: “Herriko emakume asko eta askorentzat oso garrantzitsuak izango dira bi zerbitzu horiek”. Bereziki indarkeria egoera bat, dena delakoa, pairatzen duten emakumeek eskura eta doan izango dituzten zerbitzuak dira, eta horien atzean profesionalak izango dira, Marisa Rodriguez eta Maite Santamaria. “Indarkeria matxista ezabatzea erronka garrantzitsua da gure jendartean, hala ulertzen dugu, eta gure aletxoa jarri nahi dugu aholkularitza hauen bidez, laguntza behar duten hainbat eta hainbat emakumeri espazio horiek eskaintzen”, erantsi zuen Ostolazak.
Indarkeria egoera bizi duten emakumeak izango dira bi zerbitzu horien hartzaileak, baina ez beraiek bakarrik, beren zaintza lanetan, edo horien ondoan diren beste emakume horiei begirakoak era badira bi aholkularitza zerbitzu horiek, “emakume horiek ere paper garrantzitsua jokatzen dutelako prozesu hauetan guztietan”.
Marisa Rodriguezen eskutik jasoko dute aholkularitza juridikoa Emakumeen Etxean. Genero ikuspegitik, emakumeen diskriminazio, babesgabetasun eta indarkeria egoeren inguruan laguntza eskainiko dute zerbitzuaren bidez: indarkeria matxista eta etxekoa, jazarpen sexuala, eraso sexualak, famili zuzenbidea, lanerako zuzenbidea, atzerritartasuna, etxeko langileen eskubideak, hirugarren adinarekin lotutako erretiroa, pentsioa edo alarguntasuna, eta espetxe eta zigor zuzenbidearekin lotutako aholkularitza eskainiko dute.
Aholkularitza juridikoaren bidez, emakumeen autonomia eta ahalduntzea sustatu nahi dute, erabakiak hartzeko eta irtenbideak bilatzeko prozesuan parte hartze aktiboa izan dezaten.
Zerbitzuan asteartetan eskainiko du Rodriguezek 18:00etatik 20:00etara, eta hitzordua hartu behar da aldez aurretik.
Norbanakoaren ahalduntzerako gunea Maite Santamariak kudeatuko du, ostegunetan 16:00etatik 18:00etara eta horretan ere aldez aurretik hitzordua hartu behar da. Prebentzioa eta ahalduntzea helburu izanik eta elkarreraginez baliatuz, norberaren indarretan oinarritutako baliabideak lortuko dira.
Hitzordua hartzeko 943 449 630 telefono zenbakira deitu edota posta elektronikora mezua bidal dezakete.
Balorazio positiboa
Eli Etxabeguren Emakumeen Etxearen talde eragileko kidea da, eta berak Emakumeen Etxeak bederatzi hilabete hauetan egindako bidearen balorazioa egin zuen. Martxoan zabaldu zituen ateak eta aurretik aurreikusia zutena bete den zalantzarik ez du Etxabegurenek, “emakumeen behar anitzei erantzuteko espazioa da, aisialdirako, kritika feminista lantzeko, formaziorako edota norberaren esperientzia pertsonaletik bizi dituen indarkeriei erantzun eta babes gune aurkitzeko espazioa da etxea”.
Datuak ere eman zituen eta harro azaldu horiekin. Ez da gutxiagorako, udazkenean zabaldu berri duten Eskola Feministaren lehen hiruhileko ikastaroetarako 170 emakumek eman baitute izena. “Handitu egin da kopurua beste urteekin alderatuta—azaldu zuen Etxabegurenek— eta 180 emakume pasa dira informazio bila Emakumeen Etxetik. Hilabete gutxian erakusten ari da erreferentzia gune bihurtzen ari dela, baita egiten ari garen lana ondo egiten ari garela eta zabalkunde garrantzitsua izaten ari dela”.
Azken hilabeteetan antolatu dituzten jardueretan ere parte hartzea “izugarria” izan dela esan zuen, “509 emakumek hartu dute parte jarduera ezberdinetan eta 47 gizonek Prozesu honetan ari garen emakumeontzat pozgarria da ikustea zerotik hasita bide onetik goazela. Nabaria da bestalde, herrian behar handia zegoela; bakoitzaren errealitatetik argi dago herri honek elkargune baten beharra zuela, etxe bat izateko beharra genuela”.
Emakumeen Etxea zabalik da astelehen eta ostiraletan goizez, 09:00etatik 13:00etara, eta astearte, asteazken eta ostegunetan arratsaldez, 16:00etatik 20:00etara.
