Tomas Garbizu Musika Eskolak eskaintza oparoa aurkeztu du
Tomas Garbizu Musika Eskolak ikastaroetan izena emateko epea hilaren 14an (astelehena) zabalduko dute, eta 25era arte luzatuko da.
Musika eskolako hainbat ikasle, santakrutzen hasieran. Tomas Garbizu Lezoko Udalaren Musika Eskolak eskainiko dituen ikastaroen berri eman du. Horiek, gehienbat, ikasle helduei zuzenduta daude (13 urtetik gorakoentzat), eta horietan izena emateko epea hilaren 14an hasiko dela adierazi du. Hilaren 25era arte egongo da zabalik izen-ematea. Musika eskolan bertan egin behar da kudeaketa lan hori, astegunetan, 16:30etik 20:00etara.
Musika tresnen ikastaroetan, hona instrumentuenetan eman daiteke izena: trikitixa, pianoa, klarinetea, saxofoia, txistua, flauta, perkusioa, biolina, biola, biolontxeloa, akordeoia, tronpeta, gitarra, baxu elektrikoa, bateria, atabala, darbuka*, tronboia*, tuba* eta bonbardinoa*. Bertako musika tresnen ikastaroak ere eskainiko dira: txalaparta*, panderoa*, alboka* eta dultzaina*. (* ikurra dutenak haur eta helduentzako ikastaroak dira).
Badaude ikastaro gehiago. Helduentzako Musika Hezkuntza (75 urtetik gorakoentzat); Musikoterapia, behar bereziak dituzten haurrentzat; Musika Hezkuntza Goiztiarra (1-3 adin tartekoentzat); musika elektronikoa; ganbera musika eta errepertorioa… Gainera, talde instrumentaletan ere aritzeko aukera dago, hala nola konboan, folk taldean, rockekoan, elektronikoan…
Informazio gehiago behar duenak bi modu ditu hori eskuratzeko: 943 52 99 99 telefono zenbakira deituz, edo musika eskolaren posta elektronikora idatziz.
